Дэд сайдын томилгооноос болж “Фортуна” Н.Батбаяр бөөлж байна. АН-ын дотоодод албан тушаалын хэрүүл ийм дээрээ тулжээ. Социализмын үед махны дэлгүүрт хонины гуя дагуулж заавал хүзүү зардаг байсан юм. 2000 онд сонгуульд ялсан МАХН хандивлагчдадаа бялуу хүртээхийн тулд толгой нь маруухан ч мөнгө элбэг нөхдийг дэд сайдын суудалд залсан билээ. Түүнээс хойш энэ жишиг үе үеийн хамтарсан Засгийн газрын дээвэр дор багтсан  намуудад сандал ширээний хувь хишиг тэнцүүлэх нөхөөсөнд явсаар ирсэн. Уг нь бол ёстой бийд нэмэргүй, үгүйд гарзгүй албан тушаал л даа. Н.Алтанхуягийн танхим 40 реформ хийнэ хэмээн шинэчлэлийн нэрийг өөрсдөдөө зүүсэн  ч яамдын толгойд суух хүмүүсийн томилгоо нь сүүлдээ их санасан газар есөн шөнө хоосон гэгч болж байх шиг. Дэд сайдын орон тоо хэрэггүй гэж Ерөнхий сайд нэгэнтээ ам алдсандаа бантсан болоод ч тэр үү энэ асуудал ихэд сунжирч байна. Гэтэл АН ҮЗХ-ныхоо хурлаар хэлэлцэхгүй зөвхөн Гүйцэтгэх зөвлөлөөрөө ярилцаад арван хэдэн хүний нэр жагсаажээ. Өнгөрсөн парламентын сонгуулиар өмнөх дөрвөн жилд нэр нүүрээ барсан Дорноговь аймгийн Засаг дарга асан П.Ганхуяг өвдөг шороодсон. Гэтэл болзошгүй дэд сайд нарын нэрс дотор цохиж явна гэсэн нь харин худал. Ер нь нам дотроо сэтэр зүүсэн л бол төрд дэвшиж ажиллах ёстой гэсэн хүсэл шунал энэ цагийн улстөрчдөд шингэсэн бололтой. Аль эсвэл сонгуулийн өмнө АН-ын дарга Н.Алтанхуягт өгсөн өргөл барьцныхаа хариуг нэхдэг юм болов уу. Баян-Өлгийн АН-ын дарга Х.Ержан, АЗХ-ны дарга Ж.Амарсанаа, МоАХ-ны нарийн бичгийн дарга Г.Байгалмаа, АН-ын нарийн бичгийн дарга Б.Ургамалцэцэг, ҮЗХ-ны дарга Ж.Туваан нар дэд сайд болох санаатай гэнэ. Тэдний дэргэд Бельгид Элчин сайд байсан А.Баттөр , ГХЯ-ны Консулын газрын дарга Д.Ганхуяг  хоёр харин боловсрол мэдлэг, юм үзэж нүд тайлснаараа хэний ч дор орохгүй. “Гангар”-ын захирал н.Пүрэвээ, “Комит Сервис” компанийн захирал Э.Тамир, ТӨХ-ны дэд дарга О.Эрдэнэбулган нарыг нам нь авлага өглөгөө жигдрүүлэх үүднээс ам хааж байгаа биз. Ингээд АН-ын 11 дэд дуусч байна. Нэгэнт чадал чансаа нь гол бус, сандал ширээ бөглөх тоо толгой нь чухал учраас ИЗНН өөрийн хувь Соёл, спорт, аялал жуулчлалын дэд сайдад “Hermes” компанийн захирал Х.Түмэнжаргалыг ямар ч өрсөлдөгчгүй зоочихоод байна. МҮАН-ын зүгээс намын нарийн бичгийн дарга Б.Цогтгэрэл, Батлан хамгаалахын сайд асан Ж.Батхуяг хоёрыг сойх гэнэ. Харин “Шударга ёс” нэртэй шударга бус эвслийнхэн ЗГХЭГ-ын тэргүүн дэд дарга, гурван дэд сайдад албан тушаалаас болж алалцаж буй хүмүүсээсээ дөрвийг томилж санааг нь амраах юм байна. МАХН-ынхан дотроо хоёр хуваагдаж, нөгөө ард түмнийхээ төлөө таван хувьсгал хийхтэй манатай хоёр “Э”-гээ авч хаях хорт төлөвлөгөө боловсруулжээ. Н.Энхбаярын өлсч цангасан нь юу ч биш, одоо үхэж далдарвал тэд санаа нь амрах бололтой. Амь наана, там цаагуур болсны эцэст арай чамай О.Чулуунбат, Э.Эрдэнэжамьян, эксийн туслах Б.Тулга гурвыг ЭЗХЯ, ХЗЯ, БОНХЯ-нд илгээхээр болж, одоохондоо. Ер нь намдаа үнэнч царайлсан амьтад сонгуулийн дараа жинхэнэ тараа таниулдаг юм байна. Зарим нь бүр эргэж уулзахгүй юм шиг аашилна гээч. Эрх мэдэл, албан тушаал байхгүй л бол уснаасаа гарсан загас шиг үхэх нь ээ. Тэгээд намдаа жигүүр ургуулж, фракц байгуулна. Үүнийг нам доторхи сэм хуйвалдаан гэвэл зохино. АН-ын “Алтан гадас” фракц гурван сайд, МҮДН гурван сайд, МоАХ нэг сайд, “Шонхор” хоёр сайд, “Нэг ардчилал” гурван сайд, “Зүүн хойд Ази” нэг сайд дээрээ дор хаяж 2-3 дэд сайдын суудал нэмж авна. Дэд сайдуудын томилгоо нэг тийшээ болсны дараа түр үүрэг гүйцэтгэгч төрийн нарийн бичгийн дарга нарын хэрүүл босч ирнэ. Хөөрхий Н.Алтанхуягийн эхний 100 хоног ингээд дуусах нь. Бүр цаагуураа танхимынх нь хоногийн тоо ч наашилсаар байгаа. “Ардчилсан холбоо” эвсэл дөрвөн Засгийн газрын нүүр үзсэн дээ хэмээн эдгээр томилгоон дээр нь дөрөөлөн анаж суугаа улс төрийн хүчин байхгүй л байгаасай. Нүдээ олоогүй томилгоонуудаас болж намынх нь нэг л фракц нэг өдөр МАН-тай хавсайдахад дуусаа! Х.Улз