- Эрдэнэбатын Бэхбаяр дэлхийн залуучуудын аварга болов - Тайландын Паттая хотноо болсон чөлөөт, сонгомол бөхийн дэлхийн залуучуудын аварга шалгаруулах тэмцээнээс Монгол Улсын бөхчүүд хоёр алт, нэг хүрэл медальтайгаар эх орондоо ирж байна. Тэмцээний эхэнд эмэгтэйчүүдийн 51 кг-ийн Э.Даваачимэг дэлхийн залуучуудын аварга цол хүртсэн бол тэмцээний сүүлчийн өдөр манай шилдэг залуу хүчтэн Э.Бэхбаяр алтан медалиар энгэрээ мялаалаа. Тэрээр эрэгтэйчүүдийн 55 кг-д хүч сорьсон 30 бөхөөс эхлээд Украины В.Гурскийг 2:1, 2:1 оноогоор, Энэтхэгийн Б.Ядавыг 1:0, 4:3 оноогоор, БНСУ-ын Ким Гүк Хёныг 6:1, 1:0 оноогоор, Германы М.Вольферийг 1:0, 1:0 оноогоор, аваргын төлөө баридаанд Гүржийн Лаша Талахазег 1:0, 5:0 оноогоор ялж ДЭЛХИЙН ЗАЛУУЧУУДЫН АВАРГА цолд хүрчээ. Ийнхүү Монголын чөлөөт бөхөд нэгэн шинэ од мэндэлж байна. Э.Бэхбаяр нь 2012 онд Монголын бүх ард түмний спортын их наадамд түрүүлж, 2011 оны "Mongolia Open" олон улсын тэмцээнд ДАШТ-ий мөнгө, хүрэл медальт, Монгол Улсын гавьяат тамирчин Б.Наранбаатарыг ялан хүрэл медаль хүртэж байсан юм. Мөн Паттаягийн дэвжээнд манай 74 кг-ийн бөх Б.Нямбаяр хүрэл медаль зүүжээ. Тэрээр нэгдүгээр тойрогт хийлж, хоёрдугаар тойрогт Индонезийн Х.Аззхарыг 8:2, 1:0 оноогоор, гуравдугаар тойрогт Кыргызстаны Е.Догбурбекийг 1:0, 1:0 оноогоор, дөрөвдүгээр тойрогт Туркийн бөх А.Озменийг 0:1, 5:2, 1:0 оноогоор өвдөг шороодуулсан ч мөнгөн медалийн төлөө барилдаанд ОХУ-ын бөх З.Макиевт 1:5, 3:3 оноогоор ялагджээ. Улмаар хүрэл медалийн төлөө Армений бөх Г.Григoрянтай барилдаж 0:2, 4:3, 2:0 онооны харьцаагаар ялсан байна. Сонирхолтой нь Э.Бэхбаяр, Б.Нямбаяр нар хоёулаа ДАШТ-ий мөнгө, хүрэл медальт, Монгол Улсын гавьяат тамирчин А.Энхээгийн унаган шавь нар билээ. Өмнө нь эрэгтэйчүүдийн төрөлд Гавьяат тамирчин А.Баатархүү 1979 онд Улаанбаатарт, олон улсын хэмжээний мастер С.Эрдэнэбаяр 1989 онд Улаанбаатарт, олон улсын хэмжээний мастер Т.Даваахуяг 2007 онд Бээжинд болсон тэмцээнээс дэлхийн залуучуудын аварга болж байсан юм. Б.Цагаанбаатар