“Галын наадам” хэмээн нэрлэж болохуйц гайхалтай хаалтын арга хэмжээгээр Лондон хот 11 өдөр үргэлжилсэн спортын их наадмыг хаалаа. Мөн 2016 оны их наадмыг зохион явуулах Рио де Жанейро хотод албан ёсоор эрхийг нь шилжүүлэн өгсөн юм. Орон нутгийн цагаар 20:30 цагт эхэлсэн хаалтын ажиллагааг Их Британийн “Coldplay” хамтлаг удирдан явуулсан бөгөөд Рианна, Jay Z нар мөн оролцжээ. Бусад наадмуудаас ялгаатай нь нийт оролцсон 4,200 тамирчдыг арга хэмжээнд оролцуулан, гол талбайг тойруулан суулгасан юм. Паралимпийн медалийн талбарыг БНХАУ 95 алтан медаль, нийт 231 медалиаар тэргүүлсэн бол ОХУ, Их Британи улсууд хоёр, гуравдугаар байрыг эзэгнэжээ. Оролцсон орон бүр Паралимпийн бамбарын тогоог бүрдүүлсэн 200 зэс цэцгийн дэлбээнээс нэгийг эх орондоо аваачих аж. Наадмын зохион байгуулах хорооны дарга Лорд Коу цугларсан 80 мянган үзэгчдэд хандан “Их Бритaнчуудын спорт болон хөгжлийн бэрхшээлтэй хүмүүсийн талаар бодол өөрчлөгдсөн. Паралимпийн тамирчид хязгаар хэмээх мананг арилгаж чадлаа” гэсэн байна. Ц.Мишээл