Хотын дарга Э.Бат-Үүл Улаанбаатарт цусгүй дайн хийж эхэлсэн. Түүний тэмцэж байгаа замын түгжрэл, зөвшөөрөлгүй барилга угсралтын ажил, нийтийн эзэмшлийн зам талбайг хууль бусаар өмчилдөг явдал зах зухаасаа цэгцрэх шинжтэй болж байна. Иргэдийн сэтгэл жаахан уужирч, бухимдал намжиж байгаа ч энэ бол цусгүй дайны зөвхөн оршил. Харин далд фронт дээр авлигаар холбогдсон оффисын өтнүүдийн үйл ажиллагаа нийтийн албыг цөөхөн хүний ашиг сонирхолд захируулж байна. Улаанбаатарт эмх замбараагүй барилга угсралтын ажил, нийтийн эзэмшлийн зам талбайн засвар тохижилт аль хэдийнэ гамшгийн хэмжээнд хүрчээ. Зарим газарт эгээ л дайнд нэрвэгдсэн болов уу гэмээр ундуй сундуй болсон нүх сүв, элс шороо, тоосго хавтан тааралдах нь ердийн үзэгдэл болжээ. Эдгээрийн цаана дүүргийн засаг ноёдын тендерээр далимдуулсан мөнгө унагаах ов мэх, намдаа сонгуулийн өмнө мөнгө босгох далд луйвар явагдаж байдгийг эрүүл ухаантай иргэд эрх биш гадарладаг болсон. Тэд хоорондоо нүдэнд үл үзэгдэх утсаар холбогдож, уулчид шиг бие биеэсээ уяатай зүүгдэж байдаг. Тун саяхны тов тодорхой жишээ гэвэл хүний аминд хүрэх аймшигт ослын үүдийг нээсэн НМХГ-ын дарга Л.Бямбасүрэнг ажилд нь аргацааж үлдээх гэсэн МХЕГ-ын дарга Р.Содхүү нарын арчаагүй арга заль. Өнөөдрийг хүртэл Улаанбаатарт барилга барих ямар ч зөвшөөрөлгүй 79 барилга сууриа тавихаас эхлээд арав гаруй давхар болтлоо баригдсан. Тэдгээрийн нэгэн дээр ажиллаж байсан зуурмаг шахагч автомашины ослоос үүдэж 13 настай хүүхэд, бас нэг барилга дээрх краны ослоор жолооч нь амь үрэгдлээ. Уржигдар 42 настай нэг барилгачин эмэгтэй найман давхрын шатан дээрээс унаж хорвоог орхилоо. Одоо БУАЭҮЗ-гүй 57 барилга аанай л үйл ажиллагаагаа явуулсаар байна. Гэтэл энэ бүхэнд хяналт тавьж, арга хэмжээ авах үүрэгтэй Л.Бямбасүрэн хатагтай экс шадар сайд, эрхэм гишүүн М.Энхболдын нэг ангийнх, нийслэлийн хуучин удирдлагатай хувийн ашиг сонирхлоор салахын аргагүй холбогдсон болохоор өнөөдрийг хүртэл тамгаа хормойлоод давааны цаанаас далдхан салаавч тавьж явна. Үүнийг эрхэм гишүүд далд салаавч хэмээн шинээр томьёолох болж. Яагаад гэвэл зөвшөөрөлгүй барилгуудад мэргэжлийн хяналтыг удаа дараа цалгардуулж ирсэн Л.Бямбасүрэнг ажлаас халах нийслэлийн Засаг дарга бөгөөд Улаанбаатар хотын захирагч Э.Бат-Үүлийн шаардлагын хариуд Төрийн ордноос нэгэн эрхэм гишүүн хэвээр үлдээ хэмээн сүрийг үзүүлжээ. Дээр нь Р.Содхүү дарга ширээнээсээ гулсах сүүлчийн мөчөө хүртэл Л.Бямбасүрэн хатагтайг цээжээрээ хамгаалж байгаа. Ийм л далд эрх ашгаар цус ойртсон түшмэд нийтийн ашиг сонирхлын эсрэг амь бөхтэй сөрөн зогсож байна. Цусгүй дайны жинхэнэ дайснууд нь тэд. Эрхмүүдийн хайрыг булаасан Л.Бямбасүрэн мэтийн авлигачдыг зайлуулах, эс зайлуулахаас энэ дайны хувь заяа шууд шалтгаална. Уг нь барилгын угсралтын ажлын үндсэн зөвшөөрөлгүй 83 барилгын хаяг тодорч байсан авч дөрөв нь гээгджээ. Хууль бус ажиллагааныхаа улмаас хариуцлага хүлээх ёстой 79 барилгын эздийн 76 нь шүүхийн хаалга татаж байна. Харамсалтай нь хууль бусаар сүндэрлэсэн байшин барилгуудыг хураах, нураах эрх зүйн бүрэн зохицуулалт алга. Барилгын томоохон компаниудын нууц ноёнтнууд, угжны улстөрчид төрд шургалсан учраас хотын удирдлагын шинэчлэлийн цэвэрлэгээнд шавар хаасаар байна. Саяхан хотын мэр Э.Бат-Үүл зөвшөөрөлгүй баригдаж байгаа барилгуудад содон тэмдэг тавих, үйл ажиллагааг нь зогсоох, автозамын засвар шинэчлэлтэй холбоотойгоор газар чөлөөлөх талаар хатуу арга хэмжээ авч ажиллахыг Нийслэлийн Цагдаагийн Газар, Нийслэлийн Өмчийн Харилцааны Газар, Нийслэлийн Замын Цагдаагийн Газар, Нийслэлийн Мэргэжлийн Хяналтын Газарт үүрэг даалгавар өгсөн юм. Нийтийн ашиг сонирхлын төлөө албан тушаалын буг болсон түшмэдтэй хийх хүнд суртал, авлигын эсрэг цусгүй дайныг ард нийтээр дэмжиж байна. Х.Аянга