УИХ-ын сонгуулийн үеэр Хөвсгөл аймгийн “Sky” телевизийн захирал ажилтнуудынхаа биед халдаж, заналхийлсэн ноцтой хэрэг гарсан билээ. Тус телевизийн таван сэтгүүлч, дөрвөн  зураглаачийн биед халдсан уг хэргийг прокурорт шилжүүлжээ. Энэ талаар Монголын сэтгүүлчдийн нэгдсэн эвлэлийн удирдлагууд болон халдлагад өртсөн сэтгүүлч Ж.Эрдэнэцэцэг нар өнөөдөр мэдээлэл хийлээ. Тус хэргийн Эрүүгийн хуулийн 181.2.1, 2.5 буюу бүлэглэн танхайрсан, догшин авирласан гэсэн зүйл заалтаар шалгаж буй юм байна. Монголын сэтгүүлчдийн нэгдсэн эвлэлээс олон улсын сэтгүүлчдийн байгууллагад ханджээ. Өнгөрсөн наймдугаар сард олон улсын байгууллагаас монголд ирж дээрх хохирогчидтой уулзан хэргийн талаар АНУ-ын томоохон хэвлэлүүдэд мэдээлсэн байна. Гэтэл уг хэрэгт холбогдолтой хүмүүс ямар нэгэн уучлалт хүсээгүй байж тэдгээр сэтгүүлчийг ажилд нь аваагүй бөгөөд харин зураглаачдад нэг сая төгрөг амлан ажлын байрыг нь өгнө гэжээ. Тус телевиз нь мэргэжлийн сэтгүүлзүйг орон нутагт хөгжүүлэх үйлсэд томоохон хувь нэмэр оруулсан шилдэг байгууллагад тооцогддог байсан гэнэ. Одоогийн байдлаар үйл ажиллагаа нь зогсонги байдалтай байгаа аж. Хэрэгт холбогдсон хүмүүс нь батлан даалтанд гарч, Хөвсгөл аймагт амарч зугаалсан шигээ тааваараа явж байгаад сэтгэл санаагаараа хохирч, ажлын байраа алдсан сэтгүүлчид гомдолтой байна гэдгээ дуулгасан юм. Б.Доржпагам