Хамгийн их шүүмжлэлд өртөж байдаг эрүүл мэндийн салбар асуудал ихтэй байна. Саяхан л гэхэд “Алтан элс” нэртэй дотрын чиглэлээр үйл ажиллагаа явуулдаг клиник сувилалын дотор, бөөрний тасагт хэвтэн эмчлүүлж байсан 14 өвчтөн эм тариандаа хордсон. Энэ талаар Эрүүл мэндийн сайдаас тодруулсан байна.   -Алдаа гаргасан “Алтан элс” клиник сувиллын эмч нарт ямар хариуцлага тооцсон бэ? - “Алтан элс” клиник сувиллын эмч нар алдаа гаргасан нь үнэн. Тэр шөнө нь эрүүл мэндийн сайдаар ахлуулсан ажлын хэсэг газар дээр нь очиж ажилласан. Ингээд “Алтан элс” клиник сувиллын эмчлэх тусгай зөвшөөрлийг цуцалсан байгаа. - Цаашид энэ мэтчилэн клиник сувиллууд алдаа гаргахгүй гэх баталгаа алга байна. Энэ тал дээр та салбарын сайдын хувьд хэрхэн анхаарч ажиллаж байгаа вэ? -Улаанбаатар хотод 100 гаруй клиник сувилал үйл ажиллагаа явуулдаг юм байна. Бүгдийнх нь ажлыг түр хугацаанд зогсоох Эрүүл мэндийн сайдын тушаал гаргачихсан байгаа. Учир нь эрүүл мэндийн тухай хуульд зааснаар клиник сувилал гэдэг ойлголт байдаггүй. Тодруулбал, эмнэлэг эсвэл сувилал гэсэн л ангилал байдаг юм. Тиймээс хуульд зохицуулж учраа ол гээд бүх клиник сувиллын ажлыг зогсоочихоод байна.  Ажлын хэсэг ч гарсан. - Ажлын хэсэг хэдий хэр хугацаанд шийдвэрээ гаргаж, танд танилцуулах вэ? -14 хоног -Та сайд болсноосоо хойш клиник сувиллаас гадна хувийн эмнэлэгт анхаарч байна уу. Учир нь хувийн эмнэлгийн эмч нар алдаа гаргах нь ихсэх боллоо? -Тун удахгүй хувийн эмнэлгүүдийг аттестачлах гэж байгаа. Ингэснээр үнэхээр хүнийхээ төлөө ажиллаж чаддаг сайн эмнэлгүүд ялгарч үлдэх болно. Бидний тавьж байгаа хамгийн гол зорилго бол хүнд эрүүл мэндийн тусламж үйлчилгээг хангалттай сайн үзүүлж чадаж байгаа, сайхан орчинтой, сайн эмч нартай эмнэлгийн ажлыг л дэмжиж ажиллах сонирхол байна. Гэтэл өнөөдөр зарим хувийн эмнэлэг хангалттай сайн ажиллаж чадахгүй байгаа хэрнээ эрүүл мэндийн даатгалын сангаас санхүүжилт авдаг жишээ олон байна. Энэ бүхнийг цэгцлэхээр ажиллаж байна. Б.Батцэцэг