Улсын Дээд шүүхийн Иргэний хэргийн танхимын тэргүүн Б.Ундрах Монгол Улсад худалдааны эрх зүйн чиглэлээр шүүгчдийн мэргэшил, чадавхийг бэхжүүлэх хоёр жилийн хугацаатай хөтөлбөрийг хэрэгжүүлэхэд туслалцаа үзүүлж буй Европын сэргээн босголт, хөгжлийн банк, Олон улсын эрх зүйн хөгжлийн байгууллагуудын төлөөлөгчдийг өнөөдөр хүлээн авч уулзжээ. Уулзалтын үеэр хөтөлбөрийн бэлтгэл ажил, энэ хүрээнд хийгдэх үйл ажиллагаа, тавигдах шаардлага, зарчмуудын талаар санал бодлоо солилцсон байна. Монгол Улсад худалдааны эрх зүйн чиглэлээр шүүгчдийн мэргэшил, чадавхийг бэхжүүлэх хөтөлбөр нь зээл олгогч, хувьцаа эзэмшигчдийн эрх, шударга өрсөлдөөн, дампуурал, оюуны өмч, даатгал, татвар, уул уурхай зэрэг салбартай холбоотой асуудлуудаас гадна олон улсын гэрээ хэлэлцээр зэрэг өргөн хүрээний асуудлыг хамрах тул зөвхөн иргэний төдийгүй захиргааны хэргийн шүүхийн шүүгчид хамрагдах боломжтой юм. Д.Цэцэг