Монголын үндэсний олимпийн хорооны бүх гишүүдийн жил тутмын хурал баасан гаригт болж, 2012 оны эхний 9 сард тус хорооноос хийсэн ажлын тайлан, "Лондон-2012" олимпийн наадамд оролцсон дүнгийн талаар тайлан сонслоо. Хуралд оролцсон гишүүд МҮОХ-ны үйл ажиллагаа хэвийн явагдаж буйг онцлоод Монголын баг тамирчид олимпийн наадмаас таван медаль хүртэж түүхэн амжилт үзүүлснийг өндрөөр үнэлсэн байна. Түүнчлэн дөрвөн жилд нэг удаа хуралдаж, МҮОХ-ны дүрэмд өөрчлөлт оруулан ерөнхийлөгч, дэд ерөнхийлөгч, гүйцэтгэх зөвлөлийн гишүүд, хорооны гишүүд, хяналтын зөвлөлийг сонгодог Олимпийн чуулганыг 12 дугаар сарын 19-ний өдөр Улаанбаатар хотноо явуулахаар шийдвэрлэжээ. МҮОХ-ны эрх барих дээд байгууллага - Олимпийн чуулганд МҮОХ-ны гишүүн спортын холбоод, аймаг дүүргийн олимпийн зөвлөл, олимпийн медальтнуудын төлөөлөл оролцдог билээ. Ц.Ганбат