“Хэцүү анги”, “Помогитье нам”, “Рашаантын 18”, “”Франц үнсэлт”, Гоёлын даашинз” зэрэг олон кинонд ааштай, бас адтай нэгний дүр бүтээснээрээ олонд танигдсан Соёлын тэргүүний ажилтан, жүжигчин Б.Навчааг мэдэхгүй хүн ховор биз ээ. Кино төдийгүй реклам сурталчилгаанд хүртэл мөнөөх л захирангуй харцтай, ааш муутай эмэгтэйгээр харагддаг авьяаслаг жүжигчин маань бодит амьдрал дээр харин ч эсрэгээрээ байдаг юм билээ. Охид залуустай үе тэнгийн мэт дотно харилцаж, инээж хөхөрч явдаг Б.Навчаа өдгөө “ТВ-Коктейл” хамтлагийнхантай цуг “Хоёр ертөнцийн буудал” жүжигт тоглож буй. Сэтгэхүйн эмгэнэлт драмын жүжгээр тэр урьд бүтээсэн дүрүүдээсээ огт өөрөөр хувирч чаддагаа харуулсан бөгөөд үзэгчдээс ч өндөр үнэлгээ авсан билээ. Үүгээр ч зогсохгүй, саяхан зураг авалт нь эхэлсэн “Хамгийн сайхан эмэгтэй” уран сайхны киноны гол дүрд тоглох болсон байна. Тэрбээр шинэ уран бүтээлийнхээ тухайд “Би яагаад дурлаж болохгүй гэж. Урьд нь дандаа л бусдыг загнаж, зандарсан дүрд тоглож байсан бол одоо дурлалд автаж, хайранд умбамаар байна. Энэ миний бүтээж буй анхны романтик дүр. Үзэгчид миний өөр нэгэн дүрийг “Хоёр ертөнцийн буудал”-аас олж харсан. Тэгвэл тун удахгүй дурласан Навчааг олж харах болно” гэж найз нөхөддөө аминчлан ярьжээ. Р.Есүй