УИХ-ын чуулганы нэгдсэн хуралдаан товлосон цагаасаа багагүй хугацаагаар хоцорч эхэллээ. Хурлын эхэнд Улсын Их Хурлын гишүүн, Гадаад харилцааны сайд Л.БОЛД виз олгох нөхцлийг хөнгөвчлөх тухай Монгол Улсын Засгийн газар Бүгд Найрамдах Солонгос Улсын Засгийн газар хоорондын хэлэлцээрийг соёрхон батлах тухай хуулийн төслийг танилцууллаа. Үүний дараа УИХ-ын гишүүн О.Баасанхүү Аюулгүй байдал, гадаад бодлогын байнгын хорооны санал, дүгнэлтийг танилцуулж, илтгэл тавьсан юм. Хууль санаачлагчийн илтгэлийг сонссон гишүүд өөр өөрсдийн санал сэтгэгдлийг энэ үеэр хэлж байгаа юм. Тухайлбал, УИХ-ын гишүүн С.Одонтуяа виз олгох нөхцлийг хөнгөвчлөх тухай хуулийн төслийн талаар “Солонгос руу ажиллах хүч гаргах нэрийдлээр олон залуусыг харь орон руу явуулсан. Гэвч үүнээс болж, сүүлийн жилүүдэд гэр бүл салалт ихээр нэмэгдсэн учраас энэ тал дээр анхааралтай байх хэрэгтэй” гэсэн. Харин уг асуудлаар УИХ-ын гишүүн С.Баярцогт хоёр орны эдийн засгийн харилцааны тал дээр анхаарч ажиллахыг хүслээ. Ийнхүү виз олгох нөхцлийг хөнгөвчлөх тухай Монгол Улсын Засгийн газар Бүгд Найрамдах Солонгос Улсын Засгийн газар хоорондын хэлэлцээрийг соёрхон батлах тухай хуулийн төслийг УИХ-ын чуулганы нэгдсэн хуралдаанаар хэлэлцэж баталлаа. Р.Мөнгөн