Чуулганы үдээс хойших хуралдаанд гишүүд Оюутолгойн гэрээнд өөрчлөлт оруулах төслийн талаар хэлэлцэж байна. УИХ-ын гишүүн Б.Бат-Эрдэнэ байр сууриа илэрхийлж “Оюутолгойн хөрөнгө оруулалтын гэрээнд өөрчлөлт оруулах асуудалд хатуу байр сууринаас хандах ёстой. Чуулганы үдээс өмнөх хуралдаанаас үзвэл 61 гишүүн санал хураалтад оролцсон байна лээ. Тэгвэл УИХ-ын чуулганы дэгийн тухай хуулийн дагуу гарсан, орсон нь хамаагүй. Ирцийн хүрээнд эсрэг санал авах боломж нь хэвээрээ юу, дарга аа. Нээрээ бусдын өмнөөс кноп дардаг хүн олон байгаа шүү, манайхаан. Сайн харж байгаарай” хэмээн анхааруулж, гишүүдийг инээлгээд авсан. УИХ-ын 25 гишүүн Оюутолгойн гэрээний хэрэгжилтийн талаар Монгол Улсын Ерөнхий сайд Н.Алтанхуягт шаардлага хүргүүлсэн асуудал чухам юу болов гэдгийг тэрбээр давхар сануулсан. Үзэл бодлоо хамгаалж, гишүүдийг “хулгайгаар” кноп дарчих вий гэж эртнээс болгоомжилсон түүнийг УИХ-ын дарга З.Энхболд тайвшруулж, дараагийн гишүүнээс саналыг нь сонсохоор шийдлээ. Р.Мөнгөн