Иранд шинэ хичээлийн жил эхэлж байгаатай давхцан нэгэн шинэ хориг гарчээ. Зарим нэг мэргэжлийн ангиудад эмэгтэй оюутныг суралцуулахыг хориглосон нь Иранд эмэгтэйчүүдийн сурах эрх болон удаан хугацааны дараа гарах үр дагаврын талаар ярихад хүргээд байна. Гуч гаруй их сургууль 80 орчим мэргэжлийн ангиуддаа эмэгтэй оюутан элсүүлэхгүй байх шинэ хориг гаргажээ. Үүнд инженер, цөмийн физик, компьютерээс эхлээд Английн утга зохиол, археологи, бизнесийн ухаан хүртэл олон янзын хичээлүүд багтаж байгаа юм. Яагаад ийм хориг тавих болсон тухай ямар нэг албан ёсны шалтгаан мэдэгдээгүй ч Нобелийн шагналт хуульч Ширин Эбади тэргүүтэй тэмцэгчид үүнийг улстөрчдийн боловсролтой, хүчтэй эмэгтэйчүүдээс айсан хэрэг гэж үзэж байна. “Ираны Засгийн газар эмэгтэйчүүдийг боловсрол эзэмшихийг хориглож, нийгэмд идэвхгүй байлган, гэрт нь суулгахын тулд янз бүрийн арга хэмжээ авч байна” хэмээн Ширин хэлсэн юм. Харин Дээд боловсролын сайд Камран Данешжу байдлыг намжаахаар нийт их сургуулиудын 90 хувь нь хүйс харгалзахгүй ангиудтай хэвээр байгааг сануулжээ. Ц.Мишээл