Чөлөөт бөхийн холбоо энэ сарын 27-29-нд Канад улсын Эдмонтон мужийн Страткон Канти хотод болох ДАШТ-ий эмэгтэйчүүдийн 48 кг-ийн жинд ОУХМ Б.Даваасүрэнг оролцуулахаар болсон.

48 кг-ийн жинд нэг номерт тооцогддог МУГТ, Залуучуудын дэлхийн аваргын хүрэл медальт Ц.Энхжаргалын хувьд Б.Даваасүрэнтэй өмнө нь гурав барилдахдаа хоёрт нь ялж байсан удаатай. Гэвч энэ удаа сорилт ч хийлгэлгүй сонгосонд гавьяат холбооныхондоо гомдолтой яваа.

Гэнэтийн энэ шийдвэрт аль болох тайван байхыг эрмэлзэж байгаа тэрээр миний оронд явсан тамирчин амжилт гаргаад ирвэл баяртай байх болно хэмээж байлаа. Тамирчин бүсгүйн 12 жилийн хөдөлмөрийн үр дүн энэ удаагийн ДАШТ-д гарах байсан гэдгээ ч нуугаагүй.  МУГТ Ц.Энхжаргалтай ярилцлаа.

-Та энэ удаагийн ДАШТ-д амжилт гаргана гэдэгтээ итгэлтэй байсан. Гэвч та­ны оронд өөр тамир­чин Канад улсыг зорилоо? -Миний хувьд олон жил барилдаж олон фенүүдтэй бол­сон. Тэд маань намайг Лондон­гийн олимпод оролцоно гэж мөн л харж байсан. Хэдийгээр энэ олимпод оролцож чадаагүй ч гэ­сэн  би өөрийнхөө жингийн бөх­чүү­дийн бэлтгэл сургуулил­тыг хан­гуулахад хувь нэмрээ оруулж, тусалж дэмжиж бай­сан. Энэ удаагийн ДАШТ-д оролцоно гэсэн итгэлтэй, бэлт­гэл сургуулилтаа эрчимтэй хийж  байсан. Ар гэрээ орхиж, 12 жилийн амьдрал, хөдөл­мө­рөө зориулж, золиосолсон. Тий­мээс би хэвлэлийн бага хурал зарлаж тэмцээнд явах болом­жийг олгооч гэсэн санал тавьсан хэдий ч харамсалтай нь боломж олдсонгүй. Харин одоо өөрийн­хөө оронд явсан тамирчныг амжилт гар­гаасай гэж чин сэтгэ­лээсээ хүсч байна. Ачир дээрээ миний гом­дол  зөвхөн миний л асуудал шүү дээ. Гэхдээ манай удирдах зөвлөл зөв шийдвэр гаргасан гэдэгт итгэлтэй байна. Ганцхан хувь хүн миний асуу­дал биш учраас  ард түмэн ялгаж салгах байлгүй дээ л  гэж бодож сууна. Түүнээс би хэн нэгэн удирд­лагыг буруутгаж нэрийг нь хэл­мээргүй байна. Энэ асуудал хэнээс болсныг нь ч мэдэхгүй. Цаг хугацаатай эвлэрэхээс аргагүй. Нэгэнт надаас илүү гэж найдаж явуул­сан юм чинь тэр бөх маань сайн барилдах байх аа л гэж итгэж байна. -Хүн өөрийнхөө сэт­гэлд багтсан зүйлдээ л тэмүүлдэг. Түүн шиг та ДАШТ-д өөртөө итгэлтэй  байсан. Хэдэн жилийн бэлт­гэл талаар өнгөрөв? -Зөвхөн энэ жилийн бэлтгэл биш. Анх чөлөөт бөхийн секцэнд орсон өдрөөс хойшхи бэлтгэл өнөөдөр гарах гэж байсан. Тэгэ­хээр 12 жилийн бэлтгэл гэж ойлгож болно. Үнэхээр хүнд байсан ч би уйлахгүй, уурлахгүй гэдэг дээр хатуу зогсч байгаа. Уурандаа амандаа орсон үгийг хэлээд багшийгаа, удирдлагаа гомдоочих байх гэж бодоод сэтгэлдээ л шаналсан. Гэлээ гээд би спортоо орхихгүй. Миний бие эрүүл байгаа цагт барил­дана л гэж бодож байна. -Даваан дээр морио соль­­дог явдал чөлөөт бө­хийн холбоонд удаа дараа гарч байгаа. Сая л гэхэд олим­под Насан­бур­маа­гийн оронд С. Батцэцэгийг явуу­лаад мөн л хэл ам дагуулж бай­сан. Ер нь  удирд­лагууд тань тамирч­даа багшаас нь илүү  мэд­дэг болчихоо юу даа? -Би энэ асуудлыг сайн мэ­дэхгүй. Асуудлын гогцоог хэд­хэн хоногийн дараа болох тэм­цээн л харуулах байх. Харин С.Батцэцэгийн олимпийн амжил­тад манай холбооны удирд­лагууд сэтгэл хангалуун байгаа. -Гэхдээ танд дахиад ялалт, амжилт туршлага бүгд байна? -Эмэгтэй хүний спортын амжилт эрэгтэйчүүдээс өөр. Тэр утгаараа би чөлөөт бөхөөр хо­жуу хичээллэсэн. Энэ хуга­цаанд надад боломж байсан гэ­дэгт итгэлтэй байдаг. Дахиад хи­чээл­лэх  ч цаг хугацаа байна. Энэ бол өвчин, бэртэл гэмтэл биш. Тий­мээс би дахин барил­дах боломжтой гэж бодож байгаа. -Мэдээж энэ асуудал  сэтгэлийн шарх болж үлд­сэн нь тодорхой. Магадгүй таныг  дараагийн тэм­цээнд ор гэвэл та сэтгэл зүйн хувьд бэлэн байна уу? -Сэтгэл зүйн хувьд бэлэн байна. Өнөөдөр хямралтай байгаа ч гэсэн бэлтгэл сургуу­лилт сайн байгаа. Хэдийгээр тэмцээнээс үлдсэн ч гэсэн дараагийн тэмцээндээ улам өөрийгөө хурцалж, илүү сайн барилдана гэдэгт  итгэлтэй байна. -Багш тань шавиа бүх талаар нь мэдэж байгаа. Тиймээс холбооныхоо шийд­­­­­вэрийг зөв­шөө­рөх­гүй байгаагаа удирд­ла­гууд­­даа илэрхийлсэн үү? -Миний хувьд өөрийнхөө багш, бусад уулзаж чадах хүрээ­ний удирдах зөвлөлийн гишүү­дэд хэлсэн. Сүүлдээ үр дүнд хүрэхгүй болохоор хэвлэлийн бага хурал хийлгэсэн. Тийм учраас бодит үнэнийг цаг хуга­цаа л харуулах байх. Түүнээс би хэлж шүүмжлээд энэ асуу­дал эерэгээр шийдэгдэхгүй байх гэж бодож байна. Миний оронд явсан тамирчин л сайн барилдаасай гэж бодож байна. Яагаад гэвэл үүний цаана бүхэл бүтэн Монгол Улсын нэр хүнд явж байгаа шүү дээ. Энэ шийд­вэр зөв байгаад, тэр тамирчин амжилт гаргаад ирвэл би ч мөн сэтгэл хангалуун л байна. Угаа­саа тэр тамирчны буруу гэж юу байхав. Нэгэнт холбооноос итгэл үзүүлээд явуулсан юм чинь би энэ асуудалтай эвлэрэх­гүй гээд яахав. Монголоос ДАШТ шалгаруулах тэмцээнд явсан эмэгтэй баг тамирчид амжилт гаргаасай гэж дахин дахин хүсч  байна. -Танаас залуу  тамир­чид их зөвлөгөө сургамж авдаг гэсэн? -Надаас мэдэж чадахгүй зүйлээ сэтгэлээсээ асуувал би өөрийн чадах бүхнээ харамгүй хэлж өгдөг. Миний хувьд чөлөөт бөхөөр арав гаруй жил хичээл­лэж  байгаа. Бахархууштай нь үлгэр дууриал авч хичээллэж байсан охидоос олимпийн ме­дальтан ч төрсөн. Эдгээр  тамир­чин охидын бөх барилдах со­нирх­лыг нь бадрааж, энэ спор­тоор хичээллэх боломжийг нь нээж өгсөндөө сэтгэл хангалуун явдаг. Ингэж эмэгтэй тамирч­дын эхлэлийг нь тавьсандаа өөрөө аварга болсон юм шиг сэтгэл өндөр байдаг. -Таны жингийн дараа­гийн залгамж халаа хэн бэ? -Бодвол миний оронд тэм­цээнд явсан тамирчин байлгүй дээ. Энэ тамирчин сүүлийн нэг жилд дандаа манай дээд жинд барилдсан. -Чөлөөт бөхийн эрэг­тэй тамирчдын амжилт ахихгүй байгааг хэн хүнгүй шүүмжилдэг? -Энэ үнэн. Гэвч саяын залуу­чуудын ДАШТ –ээс эрэгтэй эмэгтэй хоёр аварга, бас нэг эрэгтэй  тамирчин хүрэл медаль хүртсэнд сэтгэл дүүрэн байгаа.  Энэ дашрамд хэлэхэд бурхан надад олон сайхан боломжийг олгосон. Бөхийн спортын анх­дагч эмэгтэй болгосон бас сайхан хань бэлэглэсэн. Бөхийн спортоор хичээллэх нь надад завшаан байсан учраас би өөрий­гөө азтай хүн гэж боддог. -Хараад байхад та дээрх асуудалд тайван хандаж байх шиг? -Уур бүхнийг дийлэх шал­гуур биш гэдэг утгаар тайван байхыг  хичээж байна. Д.Нэргүй