Хонконгийн олны танил тэрбумтан, үл хөдлөх хөрөнгө болон ачаа тээвэрлэлтийн бизнесийн эзэн Сесил Чао ижил хүйстэн охиных нь сэтгэлийг эргүүлж, гэрлэж чадсан эрд 65 сая ам.доллар өгөхөө амлажээ. Саяхан түүний охин Жижи Чао удаан хугацааны турш үерхсэн найз охинтойгоо гэрлэсэн гэдэг мэдээ тарсны дараа тэрбумтан ийм зар гаргасан байна. Тэрээр ВВС-д өгсөн ярилцлагадаа охин нь ганц бие хэвээр, түүнд сайн нөхөр хэрэгтэй байгаа тухай хэлжээ.
Хонконгт 1991 оноос хойш ижил хүйстнүүдийг гэмт хэрэгтэнд тооцохоо больсон ч ижил хүйсийн гэрлэлтийг хүлээн зөвшөөрдөггүй юм.
Жижи Чао нь Манчестерын их сургуулийг дүүргэсэн бизнесмен эмэгтэй бөгөөд энэ оны эхээр Францад долоон жил үерхсэн найз эмэгтэй Шон Еаватай гэрлэжээ.
Харин түүний эцэг энэ мэдээг няцаагаад зогсохгүй түүний өгөөмөр саналд хэд хэдэн тохиромжтой байж болох хүмүүс хариу өгсөн гэнэ.
“Энэ нь авъяастай ч өөрийн бизнесийг эхлэх хөрөнгөгүй хэн нэгнийг татах урамшуулал болох юм. Надад тэр хүн баян, ядуу байх нь хамаагүй. Хамгийн гол нь өгөөмөр, сайхан сэтгэлтэй байх хэрэгтэй. Жижи бол авъяас чадвар, гадаад төрх аль аль нь хосолсон сайн эмэгтэй. Тэр минь эцэг эхдээ ачлалтай, өгөөмөр, сайн дурын ажил хийдэг” гэсэн юм.
Гэхдээ ноён Чао охиноо хүсээгүй хүнтэй нь суулгах гэж хүчлэхгүй гэлээ. Харин охин нь эцгийнхээ энэ төлөвлөгөөг маш сонирхолтой гэж үзэж байгаа бөгөөд тохиромжтой хүн сонгогдтол санаагаа чилээхгүй гэнэ.
Ц.Мишээл
СЭТГЭГДЭЛ БИЧИХ