Дорнод аймгийн нутаг дэвсгэрт үйл ажиллагаа явуулж буй БНХАУ-ын хөрөнгө оруулалтай “Петрочайна Дачин Тамсаг” компанийн  ажилтнуудын цалин хангамжтай холбоотой асуудалд УИХ дахь бие даагчдын зөвлөлийн гишүүд анхаарлаа хандуулж эхэлжээ. Энэ асуудлын хүрээнд  УИХ-ын гишүүн С.Ганбаатараас дараахь асуултад хариулт авлаа. -УИХ дахь бие даагчдын зөвлөл Дорнод аймаг руу томилолтоор яваад ирлээ. Ямар асуудалд онцгой анхаарч ажилласан бэ? - УИХ дахь бие даагчдын зөвлөлийнхөн бэрхшээлтэй асуудлуудыг шийдэхэд хамтран  ажиллахаар болсон. Тиймээс Х.Болорчулуун гишүүн бид гурав  Дорнод аймагт очиж ажиллаад ирлээ. Иргэдийн санал бодлыг сонссон. Тус аймагт   үйл ажиллагаа явуулж буй “Петрочайна Дачин тамсаг”  компанид ажиллаж буй монголчуудын цалин маш бага. Гэрээт ажилтан сардаа  120-130 мянган төгрөгийн цалинтай ажилладаг. Тэгэхдээ гэрээт  ажилтнууд  40 хоног  ажиллаж 20 хоног амардаг юм билээ. Энэ одоо юу гэсэн үг вэ. Бараг  цэрэгт явах дайны юм болж байна шүү дээ. Ингэж хүний хөдөлмөрийг мөлжиж байна. Эл асуудалтай холбогдуулан манай зөвлөлийн гишүүд тус компанийн  хятадын талтай уулзалт хийж ярилаа. Ажил олгогч хятадууд ирэх аравдугаар сарын 10-ны дотор монгол ажилтнуудын цалин хөлсөд өөрчлөлт оруулах тохиролцоонд хүрсэн.Үүнд УИХ-ын гишүүн Х.Болорчулуун нэлээд санаачлагатай ажиллаж байгаа. Миний хувьд дэмжиж ажиллаж байна. -Гэрээтээр ажилладаг сардаа 120-130 мянган төгрөгийн цалин авдаг хэдэн ажилтан байна вэ? - Гэрээгээр ажилладаг 220 гаруй хүн бий. Тэднийг ажилд зуучилдаг  “Зөв шийдэл” гэх компани байна. Энэ  компанийн ард улстөрчид бий гэсэн яриа ч  иргэдээс гарч байна лээ. “Зөв шийдэл” компани “Петрочайна Дачин тамсаг” компаниасаа 600 ам.доллараар цалинг бодож авчихаад  ажилтнууддаа  220 ам.доллар, зарим хүмүүсд 120 мянган төгрөг өгч байгаа юм. Зарим нэг нь  220 мянга төгрөг авдаг гэх мөртлөө 180 мянгыг авч байх жишээтэй. “Зөв шийдэл” компани монголчуудынхаа эрүүл мэнд,  хөдөлмөрийн нөхцөлийг золиосолж мөнгө олж байна шүү дээ. Энэ компанийн ард хэн байна. Гэрээг нь хэн  хийсэн бэ  гээд олон асуудлыг тус аймгийн удирдлагууд  бие даагчдын зөвлөлд тавьсан. Ойрын үед бид БНХАУ-ын Элчин сайдтай уулзана. Нийгмийн  хамгаалал, Уул уурхайн сайд ч эл асуудлыг тавина. Сонсгол хийнэ гэж бодож байгаа. -Тус компанид хэдэн хятад ажилтан ажилаж байна вэ? -Уг нь ажилтнуудын 10 хувь  нь хятад иргэд байх ёстой гэсэн шаардлага тавьдаг. Бид Мэргэжлийн хяналтын улсын байцаагчтай хамт явсан. Судалгаа, шалгалт хийсэн. Хятадууд байх хувиасаа хэтэрсэн. Бүр ажилтнуудынхаа тоог нуун дарагдуулдаг гэсэн мэдээлэл ч иргэдээс ирсэн. Уг компанийг хууль сахиж ажиллахыг шаардана. Н.Бүжин