Хүүхдийн мөнгийг олгох болсонтой холбогдуулан Хүн амын хөгжил, нийгмийн хамгаалын сайд С.Эрдэнээс дараахь асуултад хариулт авлаа -Хүүхдийн мөнгийг хэзээнээс олгож эхлэх вэ? -Энэ сарын 20-ноос хүүхдийн мөнгийг олгож эхэлнэ. Засгийн газрын  хуралдаанаар 0-18 хүртэлх насны  хүүхэд тус бүрт 20.000 мянган төгрөг олгохоор шийдвэрлэсэн. Эл мөнгийг олгох ажлын хүрээнд иргэдэд чирэгдэлгүй байдлаар шийдэхээр Монгол банк, Үндсэний бүртгэлийн ерөнхий газар, Нийгмийн халамж, үйлчилгээний ерөнхий газрууд хамтарсан ажлын хэсэг байгуулагдаж  хүүхдийн  мөнгийг олгох ажлыг  цахим технологи ашиглан зохион байгуулахаар боллоо. Өөрөөр хэлбэл, хүүхдийн мөнгө авах иргэн өөрөө банкаа сонгоно. Сонгосон банкны дээрээ тухай иргэн очихдоо  хүүхдийнхээ төрсний гэрчилгээ, цахим үнэмлэхээ авч очин өргөдөл гаргаж, бүртгэлийн маягт  бөглөн хүүхэддээ  данс нээлгэнэ. Ингээд тухайн арилжааны банкуудаас ирсэн мэдээллийг Улсын бүртгэлийн ерөнхий газрын мэдээлэл болон Хүний хөгжил сангийн мэдээллийн сантай тулган шалгаж, нэрсийг  Нийгмийн халамж, үйлчилгээний ерөнхий газраас баталгаажуулан Монголбанкинд хүргүүлнэ. Үүний дараа Монголбанк   арилжааны банкин дахь хүүхэд бүрийн данс руу мөнгийг нь шилжүүлнэ. -Данс нээлгээгүй хүүхдэд мөнгө олгогдохгүй гэж ойлгож болох уу? -Аль нэг арилжааны банкинд иргэд хүүхэддээ данс нээлгэнэ. Хүүхдийн мөнгийг хүсэлт гаргасан сараас нь тооцож олгоно. Өөрөөр хэлбэл энэ сарын мөнгийг авахын тулд эцэг, эхчүүд аравдугаар сарын 15-наас өмнө аль нэг арилжааны банк дээр данс нээлгэнэ. Өргөдөл гаргаснаас өмнөх сарын мөнгийг  нөхөж олгохгүй. Хүүхдийн мөнгийг олгох тусгай өдөр заахгүй тул хүссэн үедээ авч болно. Хүүхдийн мөнгийг иргэн бэлнээр, эсвэл өөрийн харилцах данс, банкны картандаа шилжүүлэх авах боломжтой. Шинэ оноос эхлэн Монголбанк төгрөгийн Т карт нэвтрүүлэх тул түүгээр авч болох юм. Асрамжийн газарт асруулж буй, хориход ял эдэлж байгаа хүүхдийн хувьд ШШБЕГ, асрамжийн газрууд Нийгмийн халамж, үйлчилгээний ерөнхий газартай гэрээ хийж тухайн хүүхдэд хадгаламж нээнэ. Асрамжийн газрын хүүхэд эцэг, эхтэй байлаа ч тэдэнд өгөхгүй, зөвхөн хүүхдэд хадгаламж нээх юм. Гадаадад амьдарч байгаа иргэдийн хүүхдийн тухайд Монголд итгэмжлэгдсэн хүнийхээ нэр дээр данс нээлгэх эрхтэй. -Хүүхдийн мөнгө авахаас татгалзсан иргэдээс хуримтлагдсан мөнгийг юунд зарцуулах вэ? -Хүүхдийн мөнгийг авахаас татгалзсан иргэдийн  мөнгийг төвлөрүүлэн хүүхдийн хөгжлийн сан байгуулж, хүүхдийг хөгжүүлэх чиглэлээр зарцуулна. -Ажилласан жил, нийгмийн даатгалын нөхөн төлбөрийн тухай хууль батлагдсан. Засгийн газраас хэзээ журам нь батлагдах вэ. Хэзээнээс хэрэгжих вэ? -Нийгмийн даатгалын нөхөн төлбөрийн тухай  хуулийн  журмыг арваннэгдүгээр сард багтааж гаргана. Иргэн өргөдөл гаргаснаар энэ хуульд хамрагдах эрх үүснэ. Хууль үйлчилснээр тухайн хүний ажилласан хугацаа таваас арван жилээр нэмэгдэнэ. Жил нь нэмэгдээд ирэхээр халамжийн тэтгэвэртэй хүмүүс хувь тэнцүүлсэн, хувь тэнцүүлсэн тэтгэвэртэй нь бүрэн тэтгэвэртэй болж, бүрэн тэтгэвэртэй хүмүүсийн авдаг мөнгө нэмэгдэх боломжтой. Энэ хуулиар ажилласан жил нь тасалдсан 900 гаруй мянган хүнд үйлчилнэ. -Хүүхдийн мөнгө авахад арилжаааны банкууд шимтгэл авах болов уу? -Суутгал авахгүй байх. Харин АТМ-аас мөнгө авбал суутгалтай байна.2013 оны эхнээс Монголбанк төгрөгийн Т карт гаргана. Т карт дотроо Ваby карттай байна. Тэр картад хүүхдийн мөнгөө шилжүүлж болно. Хүүхдийн мөнгөний картаар архи, тамхинаас бусад зүйл худалдаж авч болно. Мөн хадгаламжийн данстай хүүхэд байвал хүүхдийн мөнгийг түүнд шилжүүлж болно. Хэрэв суутгал авбал Хүний хөгжил, нийгмийн хамгааллын яам, Нийгмийн халамж, үйлчилгээний ерөнхий газарт хандаж болно. -Өндөр настан, хөгжлийн бэрхшээлтэй иргэдийн нэг сая төгрөгийн үлдэгдлийг энэ онд багтаан олгох уу? - Ахмадууд, хөгжлийн бэрхшээлтэй иргэдийн үлдэгдэл мөнгийг энэ онд олгоно.  Хүний хөгжлийн 21 мянган төгрөгийг  Монгол Улсын 2013 оны төсөвт суулгахаар болсон. Ер нь 21 мянган төгрөгийг иргэд авч дуустал дараа дараагийн төсөвт тусгаж байх юм. Иргэд гол төлөв иргэний бичиг баримтгүй, энэ талын болзол хангаагүйгээс мөнгөө авалгүй үлдсэн. Иргэд  иргэний бичиг баримтаа бүрдүүлсэн цагт нь хоёроос гурван жилийн дотор 21 мянган төгрөгийг олгож дуусна. Н.Түвшин