Загварын моделиудаас хамгийн урт хөлтэй гэдгээрээ гайхагдаж, бүр “Кран” гэх хоч хүртэл авсан топ модель Г.Уранцэцэгийн зоримог алхмыг охид хүүхнүүд хэрэндээ л биширсэн. Хөх, өгзөг, хамар, нүднийхээ өө сэвийг мэс заслыг ачаар янзлуулчихаад өөрсдийгөө “ориг” хэмээн тодотгох дуртай мисс, моделиудын дэргэд тэрбээр харин ч ёстой “ориг” зантай. Солонгосын мэс заслын томоохон эмнэлэгт үнэ төлбөргүй хагалгаа хийлгэж, эхээс төрсөн зүс царайгаа эрс “шинэчилсэн” топ бүсгүй өдгөө загварын тайзан дээр бардам гэгч нь гунхаж яваа. Олон төрлийн хагалгааг нэгэн зэрэг хийлгэж, энэ хэрээр тус эмнэлгийг сурталчлах бизнесийн ажилд гоо сайхнаараа дэнчин тавьсандаа Г.Уранцэцэг огт харамсдаггүй гэсэн. Сэтгэлд хүрэхгүй байсан нүүр царайныхаа өө сэвийг арилгаж, амьдралдаа өөрчлөлт хийсэн топ маань “Эрүү” хочноосоо хүртэл амархан салсан гэдэг. Харин төрсөн эх нь ч танихааргүй болтлоо өөрчлөгдсөн түүнд хуучнаа санагалзах үе гардаг болов уу. Аль эсвэл урьдын төрх, бүтэлгүй дурлал, таагүй хочныхоо тухай бодлыг бүрмөсөн сэтгэлээсээ авч хаясан ч байж мэднэ. Р.Есүй