Нийслэлд согтууруулах ундаагаар нийтэд үйлчилдэг ресторан, баар, караоке, дэлгүүрийнхний  төлөөллийг  Нийслэлийн Засаг дарга бөгөөд Э.Бат-Үүл өчигдөр хүлээн авч уулзлаа. Энэ төрлийн үйлчилгээ үзүүлдэг аж ахуйн нэгжүүдийн дунд давхардсан тогоор нийт 40 мянган шалгалт хийгдсэн тухай нийслэлийн Цагдаагийн газрын дарга хурандаа Д.Батжаргал хэлж байсан. Харин үйлчилгээ эрхлэгчид "Цагдаа, болон мэргэжоийн хяналтынхны шалгалт дарамт үзүүлэх хэлбэртэй байдаг. Ямар нэг тайлбар хийвэл, “та нар ирээдүйгээ архиар хордуулж байгаа” гэсэн дайрч, давшилсан үг урсан гардаг" хэмээн гомдоллож байв. “Монголын ресторан, баар диско клуб эрхлэгчдийн холбоо”-ны тэргүүн н.Мөнгөнцэцэг “Ресторан, баарыг гэмт хэргийн үүр уурхай мэт ойлголтоос салах хэрэгтэй байгаа юм. Хяналт шалгалтад манай холбооны төлөөллийг оруулж бид юун дээр алдаа гаргав гэдгээ мэдэж авах хэрэгтэй байдаг. Ийм нөхцөл байдал, хамтын ажиллагаа маш их дутагдаж байгаа" гэсэн юм. Харин Засаг дарга Э.Бат-Үүл “Бүх баар, рестораныг камержуулна. Иргэдийн аюулгүй байдлыг хангах үүднээс ийм алхам хийнэ. Энэ нь аль аль талдаа хэрэгтэй" гэлээ. Иргэн Н.Ганхуяг рестораны ажиллах цагийг тус бүрт нь үнэлчих хэрэгтэй юм. Урт хугацаагаар ажиллаж орлого олно гэж үзэж байгаа бол өндөр төлбөр төлөөд үйл ажиллагаагаа явуулахад болно гэсэн санал гаргаж байлаа. Нийслэлд хуулиар тогтоосон цагтаа хаадаггүй архи, шар айргаар үйлчилдэг аж ахуйн нэгжүүд олон бий. Уулзалтын төгсгөлд нийслэлийн Засаг дарга эдгээр бизнес эрхлэгчид эрх зүйн өнөөгийн орчныг хамтарч өөрчлөх, тэр болтол дээрх үйлчилгээг үзүүлдэг аж ахуйн нэгжүүд цагтаа хааж байх нэгдсэн ойлголтод талууд хүрлээ. Д.Цэцэг