Жоом идэх тэмцээнд түрүүлсэн залуу уралдааны дүнг зарласны дараахан нас барлаа гэж Америкийн Флорида муж улсын Броуард тойргийн цагдаагийн байгууллагын тэргүүн тус газрын сайтад мэдээлжээ. Уг хэрэг  явдал тэмцээн зохиогдсон  Дирфилд-Бич хотын амьтны дэлгүүрт энэ сарын 5-нд болсон байна. Арга хэмжээний дүнг гаргахад, бусдаас илүү  олон шавьж идсэн эндхийн 32 настай оршин суугч Эдуард Арчболдын дотор нь эвгүй оргин бөөлжиж эхэлжээ. Тэр гадаа гарсан ч дэлгүүрийн ойролцоо ухаан  алдаж унасан байна.  Аврагчид залууг эмнэлэгт хүргэсэн ч, эмч нар түүнийг аварч чадаагүй ажээ. Цагдаагийн газрын тэргүүний сайтад тэмдэглэснээр, Арчболд хэдэн арван жоом, өт идсэн байна. Гэтэл бас шавьж, өт идсэн бусад оролцогчид бие эвгүйрхсэн шинж тэмдэг илрээгүй аж. Тэмцээнд түрүүлэгчийн үхлийн шалтгааныг задлан шинжилгээ хийх үеэр тогтоох ажээ. Тэмцээнд түрүүлсэн Арчболд шагналд нь хоргүй аварга могой авах ёстой байсан гэж цагдаагийн газрын тэргүүний сайтад дурдсан байна. Гэвч одоо гол шагнал хэнд очихыг тодруулж тайлбарлаагүй байна. С.Золбоо