БНХАУ-ын төрийн томчуудын скандал дэлхий нийтийн анхаарлын төвд орсоор удаж байна. Тодруулбал Хятадын Коммунист намын Төв хорооны гишүүн асан БоСилайн хэрэг өнгөрсөн жилээс эхлэн шуугиан дэгдээгээд байгаа билээ. Тэгвэл саяхан Хятадын Ардын дээд прокурорын газраас Бо Силайн хэргийг шүүн таслах шийдвэр гаргалаа. Түүнийг шүүхээс эрүүгийн гэмт хэрэг үйлдсэн байж болзошгүй хэмээн хэрэг тулгаж байгаа. Дээд шүүхийн шийдвэртэй холбогдуулан түүнийг өчигдөр удахгүй болох гэж буй Хятадын коммунист намын их хурлын гишүүнээс хаслаа. Тэрээр ийн хэрэгт орооцолдоогүй бол ирэх сард болох намын их хурлын үеэр нөлөө бүхий улстөрийн бүлэглэлийн санал болгох хүмүүсийн нэг байсан юм. Гэвч Британийн бизнесмэн Нил Хейвудийн амь насыг бүрэлгэсэн гэмт хэрэг ийм найдварыг бүтэхгүй болгосон. Өнгөрсөн наймдугаар сард түүний гэргий Гу Кайлайг цаазлахаар шийтгэж, ёсоор болгох хугацааг хоёр жилээр хойшлуулаад байгаа юм. Н.Өрнө