АТГ-ын Мөрдөн шалгах хэлтсийн ажилтан  н.Наранбаатар өнөөдөр Хуульзүйн   дэд сайдын өрөө рүү хууль зөрчин нэвтэрч байцаах шийтгэх ажиллагаа явууллаа гэсэн эх сурвалжийн мэдээлэл бидэнд  ирсэн юм. Эл мэдээллийг дэд сайд Д.Эрдэнэжамьянаас тодрууллаа.

 -Таныг АТГ-аас ямар үндэслэлээр шалгаж байгаа юм бэ. Эсхүл тайлбар, мэдүүлэг авсан юм уу?

-Би 14.00 цагаас  О.Баасанхүү гишүүтэй уулзахаар товлосон байсан юм. Гэтэл  туслах маань “АТГ-ын нэг ажилтан уулзахаар ирсэн байна” гэхээр нь Шүүх, Прокурор, Мөрдөн байцаах албаны ажилтай холбогдуулан уулзах гэж ирсэн юм байх гэж бодоод  “Оруулчих” гэсэн юм. Гэтэл АТГ-ын ажилтан  н.Наранбаатар  надаас “ Гэрчийн мэдүүлэг авна”  гээд эрх, үүрэг танилцууллаа. Би юу ч гэрчлэх болов гэж гайхсан. Ерөнхийдөө тийм процесс болж өнгөрлөө.  Хуульзүйн дэд сайдыг байцаах шалгах,  гэж байгаа бол  АТГ урьдчилан мэдэгдэх ёстой. Хууль дүрмээ биелүүлэх учиртай.

 - Дэд сайдыг шалгах зөвшөөрлийг Х.Тэмүүжин сайд өгсөн гэсэн үү?

 -Хуульзүйн сайдаас зөвшөөрөл авсан бол  хэлмээр юм. Миний хувьд мэдүүлэг өгөх гэрчлэх бол асуудал байхгүй. Гэхдээ өрөөнд ингэж зөвшөөрөлгүй бүдүүлгээр орж ирсэн нь улс төрийн зорилготой  гэж хардаж байна. Өмнө нь  олон асуудлыг улс төржүүлж байсан гэдгийг би хэлдэг байсан. Одоо ч хэлнэ.

 -Ямар үндэслэлээр мэдүүлэг авах болсон юм бол?

 -Н.Энхбаяр даргатай холбоотой асуудалд  мэдүүлэг авах гэж орж ирсэн юм шиг байна лээ.

 Н.Түвшин