Шударга өрсөлдөөн хэрэглэгчийн төлөө газраас Солонгосын "Нонгшим" группын бэлэн гоймонг худалдаалахыг зогсоох арга хэмжээг өнгөрсөн бямба гаригаас авч эхэлсэн. БНСУ-ын Хүнс ба эмийн газраас тус гоймонгийн найрлагад бензопирин хэмээх хортой бодис байна гэж мэдэгдсэний дагуу тус улсын парламент ажлын хэсэг гарган шалгалт эхлүүлсэн төдийгүй Тайвань, Япон, Хятадын зах зээлээс тус компанийн бэлэн гоймонг эргүүлэн татах ажиллагаа явагдаж байгаа. Учир нь тус группын үйлдвэрлэж буй зургаан төрлийн бэлэн гоймонгийн амтлагчинд нь бензонпирин буюу уушиг, давсаг болон арьсны хорт хавдар үүсгэгч бодис агуулсан байгааг олж тогтоосон билээ. Үүнтэй зэрэгцэн манай улс ч тус компанийн үйлдвэрлэдэг бэлэн гоймонгийн дээжид шинжилгээ хийж байгаа бөгөөд шинжилгээний хариу гартал түр хугацаагаар бэлэн гоймон зарахыг хориглосон шийдвэрийг гаргаад байгаа. Тиймээс бид "Нонгшим" группт үйлдвэрлэсэн бэлэн гоймонгууд худалдаанд байгаа эсэхийг тодруулахаар хэд хэдэн газруудаар орсон юм. Бидний хамгийн түрүүнд очсон дэлгүүр бол Хүнсний 1. Тус дэлгүүрийн бэлэн гоймон худалдаалах хэсэгт "Нонгшим"-ийн гоймон нэг ч харагдсангүй. Худалдаанаас татсан бололтой. Өөр төрлийн гоймонгууд ч цөөн харагдсан. Тэндээсээ гараад бид "Бөмбөгөр" болон "Содхон" худалдааны төвийг зорив. Харин эдгээр бөөний төвийн хүнсний тасгийн бараг лангуу бүрт "Нонгшим"-ийн бэлэн гоймон зарагдаж байсан. Худалдагч нараас нь эдгээр гоймонгуудыг худалдаалахыг түр хугацаанд хориглосон байтал яагаад худалдаалж байгааг нь асуухад зарим нэг нь "тийм шийдвэр бидэнд албан ёсоор ирээгүй" гэцгээж байсан бол зарим хэсэг нь "тэр худалдаалахыг хориглосон нь Солонгост үйлдвэрлэсэн нь. Бидний зарж байгаа нь Хятад үйлдвэрлэсэн. Өөрөөр хэлбэл хуурамч нь" гэсэн хариултыг өгч байлаа. Уг нь Шударга өрсөлдөөн хэрэглэгчийн төлөө газраас гурван ч ажлын хэсэг гарч томоохон захууд болон бөөний худалдаа эрхлэгчид, сүлжээ дэлгүүрүүдэд ажиллаж, "Нонгшим"-ийн гоймонг худалдаалахгүй байхыг үүрэгдсэн гэж байсан ч дээрх худалдааны төвүүдэд үнэхээр шийдвэр нь очоогүй байгаа юм уу эсвэл дээрээс гаргасан шийдвэр тогтоолыг үл оошоодог зангаараа гөжиж байгаа бололтой. Бидний дараагийн очсон газар бол Улсын их дэлгүүрт байрлах "Номин" супермаркет. Тэнд "Нонгшим"-ийн бэлэн гоймонг худалдаалахаа түр зогсоосон байгаа талаар худалдагч нар хэлж байсан. Түүнээс гадна бэлэн гоймонг чанаж, худалдаалдаг зарим нэг нь газраар ороход ихэнх нь гоймонгоор үйлчлэхгүй байсан юм. Тэгсэн хэрнээ тус газруудтай зэрэгцэн орших хүнсний дэлгүүр, минимаркетуудад энэхүү гоймонг худалдаалсан хэвээр байгааг  Шударга өрсөлдөөн хэрэглэгчийн төлөө газар анхааралдаа авах биз ээ. Дашрамд дурдахад, халуун усанд хийсэн даруйд идэхэд бэлэн болдог "инстант" гэгдэх бүх төрлийн бэлэн гоймонг цельсийн 350-400 хэмийн өндөр халуунд чанаж үйлдвэрлэдэг байна. Ингэж бэлтгэх явцад гоймонд хүний биед хорт хавдар үүсгэгч бензонпирин хэмээх бодис үүсгэдэг байна. Нэг кг бэлэн гоймон тутамд  2,0-4,7 микрограмм  бензонпирин бодис агуулагддаг гэнэ.  Энэ нь хэвийн хэмжээнээс 3-7 дахин их агууламж юм. Д.Цэцэг Гэрэл зургийг Б.Мөнх-Эрдэнэ