Оюу толгойд  Монгол ажилтнуудын эрх маш их зөрчигдөж байна гэсэн мэдээллийг  өнгөрөгч долоо хоногт иргэн С Гантуяа сэтгүүлчдэд  өгч байсан юм. Тэрбээр  Оюу толгойн төслийн менежерээр ажиллаж байсан нэгэн аж. Тиймээс С.Гантуяа Монгол ажилтнуудад хандан дараахь уриалгыг гаргажээ.

Аливаа гадаадын хөрөнгө оруулагч нь тухайн улсын хууль, дүрэм, журам, тогтоол мөн түүнчлэн орон нутгийн иргэдийн соёл заншил, уламжлалыг хүндэтгэн ажиллах ёстой. Өнөөдөр Монгол орны хувьд эдийн засгийн бүхий л салбарт, тэр тундаа стратегийн ач холбогдолтой уул уурхайн салбарт гадаадын хөрөнгө оруулалттай олон компаниуд үйл ажиллагаа явуулж байна.

 Монгол улсын холбогдох хууль тогтоомж болон Олон улсын Хөдөлмөрийн байгууллагын 100-р конвенцэд заасны дагуу эдгээр компаниуд нь Монгол гадаад ажилчдын цалингийн тэнцвэртэй байдлыг хангаж ажиллах үүрэгтэй. Гэтэл бодит байдал дээр гадаадын хөрөнгө оруулалттай компанид ажиллаж байгаа Монгол гадаад ажилчдын цалингийн түвшин хэт ялгаатай байгаа нь (багадаа 10 - 20 дахин) эдийн засгийн хувьд төдийгүй Монгол хүний үнэлэмжийг бууруулж, Монгол ажилтануудыг хүндлэхгүй байх, үл ойшоох, доромжлох, дарамтлах, айлган сүрдүүлэх, заналхийлэх зэрэг сөрөг үр дагаварыг ажлын байранд бий болох үндэслэл болж байна гэж үзэж байна.

 Монголчуудын боловсролын түвшин, тухайн салбарын талаарх мэдлэг, туршлага, ур чадвар нь ихэнх гадаадын мэргэжилтэнүүдтэй дүйцэхүйц байдаг гэдгийг олонхи хүлээн зөвшөөрдөг нь тодорхой билээ.

 Гэтэл гадаадын хөрөнгө оруулалттай компаниуд Монгол ажилтануудыг зөвхөн Монгол хүн гэдгээр нь ялгаварлан гадуурхаж цалингийн хэт ялгаатай байдлыг бий болгож байгааг Монголчууд бид хүлээн зөвшөөрөх ёсгүй.  Өнөөдөр даяарчлагдсан дэлхий ертөнцөд хүнийг арьс өнгөөр нь ялгаварлах, үнэлэх биш харин боловсрол, ур чадвар, мэдлэг, ажлын туршлагаар нь үнэлж байна. Энэхүү үлгэр дуурайл болсон жишгийг Монголдоо хэрэгжүүлэх цаг нь нэгэнт болжээ.

 Ингээд гадаадын хөрөнгө оруулалттай компанид ажиллаж байгаа болон шударга бус байдлаас болж хохирсон, дарамтанд байгаа, эрх ашиг нь зөрчигдсөн бүх Монголчуудаа бидэнтэй нэгдэхийг уриалж байна.

 Үүний төлөө зүтгэхэд мэдээж бэрхшээл их тохиолдож байгаагаа би нуухгүй. Гэхдээ үүний төлөө бид зүтгэхгүй л бол энэ хэзээ ч хэрэгжихгүй.

 Би дээр дурьдсан сайн жишгийг тогтоож Монголдоо Монгол хүний үнэлэмжийг дээшлүүлж, хүн шиг амьдрах боломжыг бид өөрсдөө л бүтээж чадна.