Оюутолгойн гэрээний асуудлыг хөндөх халз мэтгэлцээнийг УИХ-ын гишүүн С.Ганбаатар, УИХ-ын С.Баярцогт нар энэ сарын 18-нд хийхээр товлосноо өнөөдөр мэдэгдлээ. УИХ-ын гишүүн С.Ганбаатар өнгөрөгч есдүгээр сарын 19-нд Оюутолгойн гэрээтэй холбоотой асуудлаар Сангийн сайд асан С.Баярцогтыг халз мэтгэлцээнд дуудаж байгаагаа зарласан. Тэрбээр гэрээ байгуулах ажлын хэсэгт орж ажилласан гишүүнийх нь хувьд түүнээс тайлбар өгөхийг олон удаа шаардсан ч өдийг хүртэл хариу өгөөгүй учир сүүлчийн арга болгон халз мэтгэлцээнд дуудаж байгаа гэж тайлбарласан юм. УИХ-ын гишүүн С.Баярцогт урилгыг хүлээн авсан бол өнгөрөгч 10 дугаар сарын 8-ны өдрийн 12.00  цагт Төрийн ордны “Б” танхимд болох байсан. Харин УИХ-ын гишүүн С.Баярцогт мэтгэлцээнийг хойшлуулах хүсэлт гаргаснаар тодорхойгүй хугацаагаар хойшлоод байсан юм. С.Ганбаатар гишүүн маргааш буюу энэ сарын 7-нд хийх хүсэлтэй байгаагаа илэрхийлсэн ч хоёр гишүүн өнөөдөр уулзан, харилцан тохиролцож мэтгэлцээний товоо гаргасан байна. Тэд энэ сарын 18-ны ням гарагт оройн 21.00 цагт МҮОНРТ-д мэтгэлцэхээр урьдчилсан байдлаар товложээ. Энэ тухайд С.Ганбаатар “Бидний татварын мөнгөөр санхүүждэг учир МҮОНРТ цаг гаргаж өгнө гэж итгэж байна. Харин цагийн тухайд удирдлагуудтай дахин тохиролцох болсон. Ямар ч байсан тэр өдөр мэтгэлцээн болно” гэлээ. Халз мэтгэлцээнээс ямар үр дүн хүлээж байгаа талаар түүнээс асуухад “Маш өндөр үр дүн мэтгэлцээнээс гарна. Үнэхээр энэ гэрээг ард иргэдэд ойлгуулах цаг нь болсон” гэж хариулав. С.Баярцогт гишүүний хувьд “Би мэтгэлцээнд хэзээд бэлэн байсан. Оюутолгойг зохицуулж байгаа дөрвөн гэрээ бий. Энэ гэрээнүүдийг л иргэдэд тайлбарлаж өгөхийг зорино” гэж байлаа. Халз мэтгэлцээнд чөлөөт хэвлэлийн төлөөлөгчдийг нээлттэй хамруулах бөгөөд иргэдийн оролцооны хувьд хоёр гишүүний туслахуудаас бүрдсэн комисс ажиллаж, зохицуулах юм байна. Мөн халз мэтгэлцээнийг хөтлөх хөтлөгчийг нийтийн санал хүсэлтээр сонгох эрмэлзлэлтэй байгаагаа хоёр гишүүн онцолж байв.