Манай гишүүд нэг л их гомддог, тунирхдаг хүмүүс болчихож. Ямар сайндаа л их эзэн Чингисийнхээ төрсөн өдөр дээр нэгнийхээ санааг үгүйсгэж, гомдсоор өнгөрөгч долоон хоногийг үдсэн. Ямар ч байсан эзэн Чингисийг төрж байхад хажууд нь он, сар, өдрийг нь тэмдэглэж суусан гишүүд мэр сэр байгаа бололтой. Р.Гончигдоржийн үзэж байгаагаар Чингис хаан 12 дугаар сарын 22-нд төрсөн бол харин 11 сарын 14 гэдгийг дуу нэгтэйгээр баталж, бүх нийтийн амралтын өдөр болгож байгаа юм. Баасан ахын төрсөн өдрөөс яаж салъя даа гэж байхад нэмээд Тэмүүжингийн төрсөн өдөр ийнхүү нэг өдөр ч гэсэн баярлах боломжийг нэмж олон баярыг огцом нэмэгдүүллээ. Үүний хажуугаар Лүндээ гишүүн бөөн гоморхол болсон хүн явна. Түүний санаа уул нь их л газар авах байсан ч газар аваагүй учир ийнхүү гомдож, хүн хүн рүү албан бичиг илгээж суугаа юм байна. Бурхан багшийн их дүйчин өдрийг бүх нийтийн амралтын өдөр болгох санааг нь тоож хэлэлцсэнгүй. Гэтэл Лүндээ гишүүн гомдсондоо хэд хэдэн нэр бүхий хүмүүс рүү албан бичиг илгээж хариугаа хүлээж суугаа аж. Эхнээсээ зарим нэг гишүүд түүний сэтгэлийг засч, гаргасан санааг нь зөв хэмээн дулдуйдаж байгаа сурагтай. Лүндээ гишүүний гомдлыг хэн, хэзээ тайлах юм бол, бүү мэд. Эх сурвалж www.wikimon.mn