Хятадын Геологи хайгуулын шинжилгээний сангийн удирдах төвийн хайгуулын дөрвөн багийнхан Өвөрмонголын төвийн нутгаас их хэмжээний нөөцтэй ураны орд илрүүлсэн тухай тус улсын хэвлэлүүд өчигдөр мэдээлжээ. Хэвлэлийнхний мэдээлж буйгаар тус орд нь ураны нөөцөөрөө дэлхийд дээгүүр байрт бичигдэх магадлал өндөр байгаа аж. Учир нь, Өвөрмонголын Дайян район дахь ураны ордын нөөц нь 51 орчим тэрбум тонн гэж “Чайна Дэйли” сонины сайтад мэдээлсэн байна. Дайян район нь элсэрхэг чулуулаг хөрстэй учир уран гаргаж авахад хүндрэлгүй гэдгийг албаныхан онцолж байгаа юм. Дашрамд дурдахад, өрөмдлөгийн 28 машин, хайгуулын шинжилгээний 500 техникч болон бусад ажилчин 300 гаруй өдрийн турш хайгуул явуулсны эцэст дэлхийн зэрэглэлийн ураны томоохон орд илрүүлсэн гэж “Ройтерс” агентлагаас мэдээлжээ. Эх сурвалж: mining.mn