Олон улсын нисэх онгоцны шинэ буудал барих төслийг хэрэгжүүлэх хөнгөлөлттэй зээлийн  гэрээг  Монгол Улсын Засгийн газар, Япон Улсын Олон улсын хамтын ажиллагааны банк хооронд 2008 оны тавдугаар сард байгуулсан билээ.  Тиймээс уг барилгын ажлын зураг төслийг Япон Улсын “Азуса Секкей”, “Ориентал консалтантс” компаниуд 2009-2011 онд боловсруулж дуусгасан. Энэхүү зураг төслийн дагуу нисэх буудлын үндсэн барилга байгууламжуудыг барих ажлыг Японы барилгын мэргэшсэн байгууллагууд гүйцэтгэхээр зээлийн гэрээнд заасан юм. Үүний дагуу Зам, тээврийн сайдын тушаалаар Үнэлгээний хороо байгуулагдаж ерөнхий гүйцэтгэгчийг сонгон шалгаруулах санал хүлээн авах ажиллагаа өнөөдөр  боллоо. Тендерт Японы хоёр хуулийн этгээд оролцох сонирхлоо илэрхийлэн саналаа ирүүлснийг Үнэлгээний хороо албан ёсоор хүлээн авсан байна. Үнэлгээний ажлыг хоёр үе шаттай хийх бөгөөд эхний ээлжинд техникийн саналыг үнэлж, үүний дараа санхүүгийн саналыг үнэлэх юм. Төв аймгийн Хөшигийн хөндийд Олон улсын шинэ нисэх буудал баригдсанаар одоогийн нисэх онгоцны буудлын үйлчилгээнд тулгараад байгаа хүндрэлүүд арилж, нислэгийн аюулгүй ажиллагааг дээшлүүлэн манай улсын иргэний агаарын тээврийн хөгжил шинэ үе шатанд орох юм. Шинэ нисэх буудал нь 2016 оны аравдугаар сард ашиглалтад орох бөгөөд  буудлын зорчигч үйлчилгээний барилга нь жилдээ  гурван сая зорчигч хүлээн авах  хүчин чадалтай орчин үеийн стандартаар тоноглогдох аж. Түүнчлэн цаг агаарын тааламжгүй байдал, салхины чиглэлээс үл хамааран 24 цагийн турш агаарын хөлөг хүлээн авах хоёр талын оролт гаралттай зурвас, нислэгийн хөдөлгөөнийг удирдах цамхаг болон бие даасан дэд бүтцийн байгууламжийн хамт баригдах юм. Монгол-Японы хамтарсан төслийн багийн инженерүүд цаашид шинэ нисэх буудлыг жилдээ 18 сая хүртэл зорчигч хүлээн авах хэмжээнд өргөтгөж болохоор зай талбайг нөөцлөсөн төлөвлөлтийг хийгээд байгаа юм байна. Зээлийн гэрээнд хүлээсэн үүргийн дагуу 2012 онд Монгол Улсын Засгийн газраас 110 квт-ийн бие даасан хоёр эх үүсвэртэй шугам, шилэн кабелийн шугам, үерээс хамгаалах далан зэрэг нийт 14 тэрбум орчим төгрөгийн ажлыг эхлүүлээд байгаа юм байна. Мөн Нийслэлийн хөрөнгө оруулалтаар шинэ нисэх буудал хүрэх замын ажлын эхний хэсэг болох зургаан эгнээ бүхий 17,7 км замын өргөтгөлийг 2013 онд дуусгахаар ажиллаж байгаа юм. Д.Цэцэг