Өчигдөр Макаод Азийн Олимпийн Зөвлөлийн ээлжит чуулган хуралдаж 2019 онд болох Азийн зуны спортын XVIII наадмыг Вьетнамын нийслэл Ханойд зохион байгуулахаар болсон байна. 2019 оны Азийн наадмыг зохион байгуулах өрсөлдөөнд Арабын Эмиратын Дубай, Вьетнамын нийслэл Ханой, Индонезийн Сурабая хотууд нэр дэвшээд байсан билээ. Эхлээд Азийн Олимпийн Зөвлөлийн ерөнхийлөгч Кувейтийн иргэн Шейх Ахмад Аль-Фахад Аль-Сабах зөвлөлийн хэд хэдэн гишүүдийг шагнаж урамшуулсан юм. Тэрээр Хятадын Хай-Ян хотын дэд захирагч Гао Жинтаод Азийн элсний спортын гуравдахь удаагийн наадмыг энэ оны зургадугаар сард амжилттай явуулсан хэмээн “Merit Awards” шагналыг олгосон бол Кыргызстаны Олимпийн Хорооны ерөнхийлөгч Мурат Саралиновыг Төв Азид спортыг хөгжүүлж байгаа гэж сайшаан мөн энэ шагналыг хүртээжээ. Азийн Олимпийн Зөвлөл болон 2014 оны Инчоны Азийн наадмыг зохион байгуулах хорооныхон “Самсунг Электроникс”-той албан ёсны гэрээг байгуулснаа зарлажээ. Ингээд эдгээр үйл явдлын дараа 2019 оны Азийн наадмыг зохион байгуулах хотыг зарласан бөгөөд үүнээс өмнө Дубай хот нэрээ татаж авснаар Ханой, Сурабая хотууд үлдсэн юм. Вьетнамын соёл, спорт, аялал жуулчлалын сайд Хоанг Туан Ан Ханой хот энэ наадмыг зохион байгуулахад бэлэн гэдгээ хэлсэн бол Индонезийн Олимпийн хорооны ерөнхийлөгч Рита Субово Индонезийн засгийн газраас Сурабаяа хотыг бүх талаар дэмжиж байгаа гэдгийг илэрхийлжээ. Санал хураалт явагдсаны дараа Шейх Ахмад ялагчаар Вьетнам улсын нийслэл хотыг зарласан юм. Вьетнам улс 2003 онд Зүүн Өмнөд Азийн наадмыг зохион байгуулж байжээ. Тэд 2019 оны Азийн наадамд зориулж 150 сая долларыг шинэ спортын ордон болон тамирчдын тосгон барихад төсөвлөж байна. 2010 онд Азийн наадам Гуанжоуд болсон бол дараачийн наадам 2014 онд БНСУ-ын далайн тээвэр болон нисэх онгоцны боомт хот Инчонд болох юм. А.Од