Тэмүүжин нумын хөвчнөөс төрөөгүй юм Тэмүүжин сумын зэвнээс гараагүй юм Тэмүүжин Өүлэн эхээс төрсөн юм Тэмүүжин Өрлөг түүхээс гарсан юм Амар заяа хомс доголон нулимст хорвоод Аврах тавилан мөхөс долоон үеийн тэртээд Атаа хорслын манцуйд Есүхэйн хүү өсөж Аян дайны онгодоор есөн тугаа тахисан юм Монголчууд баяртай байна.  Их Хаантнаа хүндэтгэн дурсах нэрийн өдөртэй боллоо! Ийм өдөр байх нь л чухал болохоос биш энэ өдөр Их Хаантан төрсөн, эсэх нь жич асуудал юм. Он тоолол бол өөрөө болзолт, зохиомол, харьцангуй зүйл. Ингэхлээр он, сар, өдөр бүгд болзолт, харьцангуй.. Хэн ямраар ч тоолж болно. Тэгэж ч ирсэн билээ. Бүх нийтээрээ тохиролцоод л жилийн 365 хоногийн алинаас нь ч шинэ оныг эхлүүлж болох жишээтэй… 800 гаруй жилийн өмнөх бүү хэл 80 жилийн өмнө төрсөн олон хүн эхээс мэндэлсэн сар, өдрөө мэдэхгүй байх баримт хаа сайгүй шүү дээ… Яг, таг тогтоочих боломжгүй зүйлээр зартай зөрүүд, эсвээс жаахан “но”-той,  бас ямар нэгэн “шагнал” горилхийлсон хүмүүс л “маргах гэж маргалдаж” байдаг ажээ. Яс, тас тогтоох боломжгүй бол цаг нь иртэл хүлээх, хүлээсээр байх ганцхан л гарц бий. Их Хаантны тухайд бол түүний үзэл бодол, үйл хэрэг, хүсэл мөрөөдөл, тавьсан зорилт, хэрэгжүүлсэн арга, ухаан, их жанжны ялах урлаг зэрэг нь л чухал болно. Их Хаанаа энгийнээр, энгүй алдаршуулах нь өөрт нь зохих бизээ. Учир нь Хаантан бээр энгийн монгол эр, энгүй суут нэгэн, Хаадын Хаан, Жанждын Жанжин билээ. Эх сурвалж: “ТВ 7 хоног“ сэтгүүл