Монгол Улсын Үндэсний аюулгүй байдал, улс орны нийгэм, эдийн засгийн тогтвортой хөгжлийг хангах үүрэг бүхий Онцгой байдлын асуудал эрхэлсэн байгууллагын бие бүрэлдэхүүн төрийн үйлчилгээг иргэдэд түргэн шуурхай хүртээмжтэй хүргэж ажиллах үүрэгтэй. Түүнчлэн албан хаагчид нь ёс зүйтэй, хариуцлагатай байж, албаны бэлтгэл бэлэн байдлыг сайтар хангах, иргэдийн амь нас, эд хөрөнгийг аврах, хамгаалах, тэдэнд туслах үүрэг, хариуцлагаа чандлан сахиж биелүүлэх ёстой.   Гэвч Онцгой байдлын асуудал эрхэлсэн байгууллагын талаар сүүлийн үед хэвлэл мэдээллийн хэрэгслээр таагүй мэдээлэл цацагдаж албаны нэр хүнд, албан хаагчдын хариуцлагын асуудал хөндөгдөх болсон. Иймд, Онцгой байдлын ерөнхий газрын дарга, онцгой байдлын хурандаа Т.Дуламдоржийн шийдвэрээр зарим анги,  байгууллагын үйл ажиллагаанд албаны шалгалт хийжээ. Шалгалтын үеэр албаны бэлтгэл бэлэн байдал хангаагүй, ажлын хариуцлага алдсан зарим анги, байгууллагын удирдлага, албан тушаалтанд хариуцлага тооцсон байна. Тухайлбал, ОБЕГ-ын харьяа Аврах тусгай ангийн захирагчаар ажиллаж байсан онцгой байдлын хурандаа А.Батмөнх албан хаагчдыг гүйцэтгэх чиг үүргээс нь өөр ажилд буюу, хувийн компанийн барилга дээр ажиллуулснаас болж нэг албан хаагч хүндээр гэмтэн хөдөлмөрийн чадваргүй болсон. Иймд тус ангийн захирагчийг үүрэгт ажлаас нь чөлөөлж, албан тушаал бууруулах шийтгэл ноогдуулан  нийслэлийн Онцгой байдлын газрын Тамгын газрын даргаар ажиллаж байсан онцгой байдлын хурандаа Д.Чинзоригийг томилжээ.   Мөн Сэлэнгэ аймагт тохиолдсон усны ослын үеийн аврах ажиллагаа явуулсан байдал, нөхцөл байдлыг газар дээр нь шалгахаар ОБЕГ-ын Гамшигтай тэмцэх газрын дарга онцгой байдлын хурандаа С.Цогтбаатараар ахлуулсан ажлын хэсгийг тус аймагт ажилласан байна. Шалгалтын үеэр албаны бэлтгэл бэлэн байдлыг сулруулсан, ажлын дотоод зохион байгуулалт хангалтгүй, албан хаагчдаас ирүүлсэн санал гомдол, удирдлагын буруу арга барил, ажлын байрны тодорхойлолтод заасан чиг үүргийг удаа дараа хангалтгүй биелүүлсэн зэргийг нь шалган тус аймгийн Онцгой байдлын газрын дарга, онцгой байдлын хурандаа Б.Равдандоржийг үүрэгт ажлаас чөлөөлсөн байна. Түүний оронд ОБЕГ-ын Бодлого төлөвлөлт, сургалт сурталчилгааны хэлтсийн дарга, онцгой байдлын хурандаа Б.Ууганбаярыг томилсон байна. Мөн тус газарт санхүүгийн ноцтой зөрчлүүд илэрсэн тул ахлах нягтлан бодогч, онцгой байдлын хошууч Р.Наранцэцэгийг албан тушаалаас нь чөлөөлж зарим албан тушаалтанд сахилгын шийтгэл ногдуулжээ.   Албан хаагчдаас ирүүлсэн санал, гомдлын мөрөөр асуудлыг шалгаж тогтоосны дагуу Аврах, гал унтраах 36 дугаар ангийн захирагч онцгой байдлын хошууч Д.Баярааг үүрэгт ажлаас өөрчилж онцгой байдлын хошууч Ч.Баатарсүхийг,  тус газрын орлогч, гамшгаас хамгаалах хяналтын тасгийн даргаар онцгой байдлын дэд хурандаа Н.Бат-Эрдэнийг тус тус томилсон байна.   ОБЕГ-ын дарга, онцгой байдлын хурандаа Т.Дуламдорж Онцгой байдлын албаны аль ч шатанд албан хаагчид ёс зүй, хариуцлага, сахилга батыг сахин ажиллаж албаны нэр хүндээ өндөрт өргөн, дахин алдаа дутагдал гаргахгүй байхыг төв, орон нутгийн анги, байгууллагын нийт бие бүрэлдэхүүнд анхааруулж эрхэлсэн ажилдаа хариуцлагагүй хандсан удирдлага, албан тушаалтантай хариуцлага тооцон ажиллахаа мэдэгджээ.   П.Наран