Зэвсэгт хүчний жанжин штабаас Өмнөд Судан улсад энхийг сахиулах үүрэг гүйцэтгэж яваад нас барсан талаар монгол цэргийн албан хаагчийн талаар мэдээлэл хийлээ.   Ахлагч Г.Мөнх-Эрдэнэ нь Өмнөд Судан дахь НҮБ-ын мандаттай энхийг сахиулах ажиллагааны нэгдүгээр ээлжийн батальоны удирдлага, дэмжлэгийн ротын тээврийн салаанд жолооч албан тушаалд үүргээ амжилттай гүйцэтгэж байгаад энэ сарын 13-ны өдөр өвчний улмаас нас баржээ. Тэрээр Зэвсэгт хүчний 123 дугаар ангид сургалтын процесс хангах салааны зенитийн салаанд сумлагч-жолооч албан тушаалтай байсан аж. Тэрээр  Өмнөд Судан улсын Лейкс мужийн Румбек хот дахь НҮБ-ын баазад ойрын болон холын эргүүлд үүрэг гүйцэтгэж байжээ. Тухайн өдөр түүний бие гэнэт муудан таталт өгсөн тул эмнэлгийн анхан шатны тусламжийг үзүүлэн Камбож улсын хоёр дахь шатлалын эмнэлэгт хүргэсэн байна. Яаралтай эрчимт эмчилгээ хийсэн ч зүрхний архаг дутагдал буюу зүрхний шигдээс өвчний улмаас нас барсан хэмээн Зэвсэгт хүчний жанжин штабаас мэдээллээ.   Тэрээр 1978 онд Сэлэнгэ аймгийн Орхонтуул суманд төрсөн, эхнэр, хүүхдийн хамт амьдардаг байсан гэнэ. 2006, 2009 онд Сьерра-Леон улс дахь НҮБ-ын энхийг дэмжих ажиллагааны Монгол Улсын цэргийн багийн II, VIII ээлжинд үүргээ амжилттай биелүүлэн “Энхийн төлөө” медаль, НҮБ-ын медаль I, II, “Эх орны төлөө III” хүндэт тэмдэгээр тус тус шагнагдаж байжээ. Талийгаачийг өнгөрөгч амралтын өдөр Туркийн агаарын тээврийн онгоцоор эх оронд нь авчирсан бөгөөд ар гэрийнхнийх нь хүсэлтээр Ховд аймагт хүргэсэн гэнэ.   Өнөөдрийн байдлаар НҮБ-ын энхийг сахиулах ажиллагаанд манай улсын 1300 гаруй цэргийн албан хаагч үүрэг гүйцэтгэж байгаа юм байна. Энхийг сахиулах ажиллагаанд оролцох цэргийн албан хаагчийг бэлтгэл сургуулилт хийж, эрүүл мэндийн шаталсан шинжилгээ, оношлогоонд орж тэнцсэн цагт ажиллагаанд оролцох эрхтэй болдог гэнэ. Монгол улсын цэргийн албан хаагчид 2002 оноос хойш энхийг дэмжих ажиллагаанд оролцох болсон цагаас хойш гуравдахь удаагаа энхийг сахиулагч өвчний улмаас нас барсан тохиолдол нь энэ гэнэ.   П.Наран