Өвлийн спортын төрлүүдээс үзэгч сонирхогчдын анхаарлыг гойд ихээр татдаг биатлоны шинэ улирал эхлэхэд бэлэн болж байна. Арваннэгдүгээр сарын 24-нөөс арванхоёрдугаар сарын 2-нд Шведийн Остерсунд хотноо болох Дэлхийн цомын эхний тэмцээнд онч мэргэ, хурд шандсаа сорихоор биатлончид зорьж очсоор. "Сочи-2014" цагаан олимпийн оршил, сорилго болох тул шинэ улиралд өвлийн спортынхны өрсөлдөөн тэмцэл илүүтэй өрнөх нь. Нөгөө талаар эмэгтэйчүүдийн лидер Магдалена Нойнер хийгээд шилдгүүдийн тоонд багтаж явсан Хелена Экхольм, Анна Богалий-Титовец нар зодог тайлснаар бүсгүйчүүдийн дунд "бялуу хуваах" том ажил ундрах төлөвтэй. Мартин Фуркад, Эмиль Хегле Свендсен, Евгений Устюгов, Арнд Пайффер, Тарье Бё нарын ид бяр жагссан залуустай домогт Оле-Эйнар Бьорндален хэрхэн өрсөлдөх вэ? гэдэг асуултын хариу ч сонин байх биз ээ. Харин 2013 оны Дэлхийн аварга шалгаруулах тэмцээн ирэх хоёрдугаар сарын 6-17-нд Чехийн Нове-Место хотноо болох юм.   Биатлоны Дэлхийн цомын хуваарь 2012.11.24-12.02                    Остерсунд (Швед) 2012.12.05-12.09                    Хохфильцен (Австри) 2012.12.12-12.16                     Поклюка (Словен) 2013.01.01-01.06                    Оберхоф (Герман) 2013.01.08-01.13                    Руполдинг (Герман) 2013.01.16-01.20                    Антхольц-Антерселва (Итали) 2013.02.27-03.03                   Холменколлен (Норвег) 2013.03.04-03.10                   Сочи (ОХУ) 2013.03.11-03.17                    Ханты-Мансийск (ОХУ)   Ц.Ганбат