Нийслэлийн удирдлагын зөвлөлийн хуралдаан өчигдөр болж нийслэлийн Засаг дарга бөгөөд Улаанбаатар хотын захирагч Э.Бат-Үүл удирдан явууллаа. Хуралдаанаар хэд хэдэн асуудлыг хэлэлцсэн юм. Хуралдааны эхэнд нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Улаанбаатар хотын 2013 оны эдийн засаг, нийгмийн зорилтын төсөл”-ийг танилцууллаа.
Ñàяхан нийслэлийн Засаг дарга үйл ажиллагааны мөрийн хөтөлбөрөө НИТХ-ын V хуралдаанаар хэлэлцүүлж батлуулсан. Тэгвэл энэ удаагийн удирдлагын зөвлөлийн хуралдаанаар үйл ажиллагааны мөрийн хөтөлбөрөөс 2013 онд хэрэгжүүлэх ажлын дэлгэрэнгүй төлөвлөгөөг харьяа газрын агентлагуудын дарга нарт танилцуулж хэлэлцүүлсэн юм. Нийслэлийн харьяа агентлагуудаас хоёр удаа Засаг даргын мөрийн хөтөлбөрийн талаар санал авсан байна. Ингэснээр ирэх онд 400 гаруй ажлыг хэрэгжүүлэхээр боловсруулжээ. Нийслэлийн Засаг даргын үйл ажиллагааны таван А хөтөлбөрийн хүрээнд хийх ажлуудыг тайлагнав.
Ирэх онд гэр хорооллын дахин төлөвлөлт, тохилог амины орон сууцаар хангах, иргэдийн амьдрах орчин нөхцөлийг аюулгүй болгох, алслагдсан болон захын дүүргүүдийг дэд бүтцээр хангах, нийгмийн суурь үйлчилгээний асуудлуудыг шийдэхээр голлон тусгасан байна. Мөн улс нийслэлийн төсвөөр зургаан сургууль, 11 цэцэрлэг, таван спорт цогцолборыг барих ажлыг хийхээр төлөвлөжээ. Шинээр барих 86 ажил, өргөтгөл шинэчлэлийн 68 км автозамын ажил он дамжих замын ажил, төрийн үйлчилгээний асуудлыг шийдвэрлэх, нийтийн тээврийн парк шинэчлэлт, эмнэлэг, сургууль, цагдаагийн байр барих зэрэг ажлуудыг хийхээр төлөвлөгөөндөө тусгасан байна.
Улаанбаатарын агаарыг цэвэр болгох ажлын хүрээнд одоо хийгдэж буй агаарын бохирдлыг бууруулахаар хэрэгжүүлж байгаа арга хэмжээг эрчимжүүлэх, утаа бага ялгаруулдаг троллейбус, дуобусыг нэмэгдүүлэх, нийтийн тээвэрт өөрчлөлт шинэчлэлтийг хийх юм байна. Мөн нийтийн тээврийн салбарт байгаль орчинд ээлтэй дэвшилтэт технологийг нэвтрүүлэн, стандартаас илүү хорт утаа ялгаруулж байгаа тээврийн хэрэгслийг хөдөлгөөнд оролцохыг хязгаарлаж, журамлах замаар автомашинаас хамааралтай агаар бохирдуулалтыг бууруулах, хотын тоосжилтыг бууруулж ногоон байгууламжийг нэмэгдүүлэх, сул шороон хөрс бүхий гудамж талбайг үе шаттайгаар хэрэгжүүлэх ажлыг ирэх онд хийхээр төлөвлөсөн байгаа аж. Мөн нийслэлд “цэцэрлэгч”-ийн ажлын байр бий болгож, тэдгээр нь нийслэлд ургаж буй, зүлэгжилт, ногоон байгууламж, цэцэрлэгжилтийг хамгаалах, арчлах үүрэг хүлээх юм байна. Нийслэлд үйл ажиллагаа явуулж буй томоохон хайрга, карьер, тоосгоны үйлдвэрүүд иргэдийн амьдрах орчин нөхцөлд аюултай байдлыг бий болгож, ихээхэн бухимдал үүсгэдэг. Тэгвэл ирэх жилд хотын дарга томоохон үйлдвэрүүдийг хотоос гаргах ажлыг шат дараатайгаар хэрэгжүүлэх гэж байна. Тэрээр Улаанбаатар хотын хөгжлийн ерөнхий төлөвлөгөөг хуульчлан батлуулж, үе шаттай хэрэгжүүлнэ гэдгээ мэдэгдсэн билээ.
Мөн нийслэлийн дүүрэг бүрт иргэдийн санаачилга, оролцоотойгоор гэр хорооллыг инженерийн шугам сүлжээнд холбох хэсэгчилсэн төлөвлөлт хийж, загвар төсөл боловсруулан хэрэгжүүлэх юм байна. Улаанбаатар хотын гэр хорооллыг дэд бүтэц бүхий амины орон сууцны хороолол болгон хөгжүүлэх хэсэгчилсэн ерөнхий төлөвлөгөөг дүүрэг, хороод тус бүрээр, бүсчилэн боловсруулж зургаан жилийн дотор хэрэгжүүлэхээр үйл ажиллагааны мөрийн хөтөлбөртөө тусгасан. Тэгвэл энэ ажлыг шат дараатайгаар хэрэгжүүлж гэр хорооллыг амины орон сууцжуулж, дэд бүтэцэд холбох юм. Мөн Хотын зүүн хэсэг УС-15, баруун хэсэг Баянхошуу, хойд хэсэг Таван буудал орчимд орчин үеийн дэвшилтэт технологи бүхий дулааны станцыг үе шаттайгаар барих юм байна.
Хотын дарга алслагдсан дүүрэг буюу дагуул хотыг дэд бүтэцжүүлж, хөгжүүлэх ажлыг шат дараатайгаар зохион байгуулна гэсэн. Тэгвэл Улаанбаатар хотын дагуул хот, тосгон, суурьшлын бүсүүдийг хөгжүүлэх хөгжлийн ерөнхий төлөвлөгөө болон хэсэгчилсэн ерөнхий төлөвлөгөөг боловсруулж, инженерийн хангамжийн бие даасан эх үүсвэрээс хангагдсан, тохилог амины орон сууцны хотхон, хороолол болгох чиглэлээр хөгжүүлэхээр төлөвлөсөн байна. Мөн 50 мянган ажлын байрыг шинээр бий болгох, иргэдийн хамгийн ихээр гомдол гаргадаг цахилгаан дулааны асуудлыг шийдвэрлэх зэрэг олон ажлыг ирэх онд хийхээр төлөвлөөд байгаа юм. Ирэх онд хийх хэрэгжүүлэх ажлын төлөвлөгөөгөө НИТХ-ын тэргүүлэгчдийн хурлаар хэлэлцүүлэх юм байна.
Ж.ГАНЦЭЦЭГ
СЭТГЭГДЭЛ БИЧИХ