ОХУ-ын гоо бүсгүйг шалгаруулах тэмцээн өчигдөр болж энэ оны Оросын хамгийн гоо бүсгүйг тодорууллаа. Тэмцээнд нийт 50 гоо бүсгүй оролцсон бөгөөд тэндийг тэмцээнд оролцох хүсэлтэй 30 мянган үзэсгэлэнт охиноос шалгаруулжээ. Энэ оны Оросын миссээр 18 настай Элизавета Голованова тодорсон юм. Тэрээр Смоленскаас оролцож ийнхүү их гүрний сайхан бүсгүйгээр шалгарчээ. Түүнийг титэмийн эзэн болоход зөвхөн үзэсгэлэнт царай, сайхан үснээс нь гадна ухаалаг байдал нь  нөлөөлсөн хэмээн шүүгч нар хэлсэн юм. Элизавета Голованова ахлах сургуулиа алтан медальтай төгссөн. Түүний дараагаар Москвагийн их сургуульд хамгийн өндөр оноогоор элсэн оржээ. Түүний хэлэх дуртай үг нь “ Аав ээжийнхээ нүднээс нулимс унагахгүй амьдрах”  гэнэ. Түүний энэхүү нэр хүндтэй титмийг 100 мянган ам.доллар дагалдаж байгаа. Үүнээс гадна түүний хувьд хамгийн онцгой бэлэг нь дэлхийн аль ч их сургуульд үнэ төлбөргүй сурах эрхийн бичиг дагалдаж байгаа юм. Тэрээр ирэх оны дэлхийн миссийн тэмцээнд эх орноо төлөөлөн оролцоно. Гэхдээ түүнээс өмнө тэрээр хэд хэдэн хүмүүнлэгийн үйлс хийх үүрэгтэй болж байгаа юм. Э.Мөнхнасан