Түвдийн Чинхай аймагт мянга гаруй оюутнууд эрх чөлөө, тусгаар тогтнолынхоо төлөө тэмцэж зулын гол болон шатаж  амь насаа алдаж буй энгийн номхон ард иргэдээ өмөөрч жагсаал хийжээ. Оюутнууд жагсаал хийх үеэрээ түвд хэлээр өөрсдийн үзэл бодлоо илэрхийлж уриа лоозонгоо чанга дуугаар хэлж хашхиралдаж байсан аж. Жагсаал өглөөгүүр тайван замаар үргэлжилж байсан бол үдээс хойш гэхэд цагдаа нар ирснээс хойш мөргөлдөөний шинжтэй болсон юм. Жагсаалыг тараахын тулд цагдаа нар оюутнуудад шаардлага тавьж эхэлсэн боловч энэхүү жагсаал мөргөлдөөн болон төгссөн байна. Цагдаа нар болон оюутнуудын хоорондох мөргөдөөний улмаас 20 гаруй оюутнууд зодуулж хүнд болон хөнгөн гэмтэл авч эмнэлэгт  хүргэгджээ. Тэдгээр оюутнуудын дөрөв нь нэлээд хүнд гэмтэл авсан аж.  Мөн жагсаалд оролцсон оюутнуудын олонх нь Цолхо эрүүл мэндийн институтын оюутнууд байжээ. Өнгөрсөн долоо хоногт Ганьсу, Сичуань, Чинхай аймгуудад дөрвөн хүн зулын  гол болж өөрийгөө егүүтгэсэн хэрэг гарсан. Сүүлийн өдрүүдэд  зулын гол болон амиа алсан хүмүүс 18-24 насны идэр залуус байсан аж. Хэдийгээр хятад түвдийн дотоод зөрчил болоод өөрийгөө шатааж буй хүний дүрсийг олон нийтийн сувгуудаар гарах нь хятадад хориотой байдаг ч гадаадын сэтгүүлч,  сурвалжлагчид энэхүү дүрс бичлэгүүдийг нийтэлсээр байдаг. Үүнийг дэмжсэн оюутнууд ч энэ жагсаалд нэгдсэн байжээ. Энэ дүрс бичлэгээр дамжуулан түвдийн ард түмэн хэрхэн эрч чөлөөнийхөө төлөө тэмцэж, харамсалтайгаар амь насаа алдаж байгааг олон улсад харуулахыг хүсч байгаа аж. 2011 оноос хойш түвдэд 80  орчим хүн ийнхүү эр  орныхоо эрх чөлөөний төлөө халуун галд амьдаараа шатаж үхсэн гэсэн тоо баримт байна. Хятадын Коммунист намын их хурлын үеэр л гэхэд зургаан хүн зулын гол болон шатжээ. Тэдгээр иргэдийн тэмцэл, эр зоргийг хий дэмий өнгөрүүлэхгүй гэсэн сэтгэлээр түвдийн ард түмэн өмнөхөөсөө ч илүүтэйгээр тэмцэж эхлээд байна. Э.Мөнхнасан