Сонгуулийн ерөнхий хорооны дарга Ч.Содномцэрэн хэвлэлийн хурлын үеэр сэтгүүчдийн асуултад хариуллаа.

-Зарим дүүргүүдийн сонгуулийн дүнг яагаад мэдээлсэнгүй вэ?

-Сүхбаатар болон Хан-Уул дүүргийн нэгдсэн дүн ирээгүй. Тухайлбал Хан-Уул дүүргээс  4 хорооны 7 хэсэгт ирц хүрээгүй гэсэн мэдээлэл ирлээ. Сүхбаатар дүүрэгт болохоор  7 хорооны 13 хэсэгт ирц хүрээгүй. Тийм учраас дахин санал хураалт явуулсны дараа ирцээ албан ёсоор мэдээлэхээр болсон.

-Нийслэлд ирц хүрээгүй хэчнээн тойрог байна вэ?

-Нийслэлд 149 хэсэгт дахин санал хураалт явуулна. Аймгуудын ирц хүрсэн. Ганц нэг хэсгүүд бий. Дахин санал хураалт явуулах зардлыг тооцож аймаг дүүргийн хороод хэвлэх үйлдвэртэй гэрээ байгуулсан. Өчигдөр саналын хуудсаа хэвлүүлж дууссан.  Дүүргүүдийн саналын хуудсыг өчигдөр шөнө хэвлэж дууссан байх ёстой.  Энэ талаари мэдээллийг бүрэн авч дуусаагүй. Хуульд  саналын  хуудсыг Аймаг, сум, дүүргийн сонгуулийн хороод хэвлэж хүргүүлэх ажлыг зохион байгуулна гэж заасан.

-Дахин санал хураалтыг амралтын өдөр явуулна гэсэн мэдээлэл хэр  үндэслэлтэй юм бэ?

-СЕХ аймаг дүүргийн сонгуулийн хороодод хоёр удаа зөвлөмж  хүргүүлсэн. СЕХ шууд үүрэг өгөх эрх зүйн үндэслэл байхгүй. Гэхдээ энэ удаагийн дахин санал хураалтыг амралтын өдөр зохион байгуулах тухай зөвлөмж хүргүүлсэн. Тэр нь арванхоёрдугаар сарын 1-2-ны өдрүүд. Аймаг дүүргийн сонгуулийн хороодоос  СЕХ-ны зөвлөмжийг хэрэгжүүлэх боломжгүй гэсэн хариу ирсэн. Ихэнх дүүргүүд арваннэгдүгээр сарын 30-ны өдрийн баасан гарагт дахин санал хураах тов гарсан. Хуульд дахин санал хураалтын шийдвэрийг Аймаг, сум, дүүргийн сонгуулийн хороо гаргана гэж заасан. Ажлын өдөр дахин санал хураалт явуулж болохоор хуульчилсан учраас дахин санал хураалтыг ажлын өдөр явуулна

-Сонгуулийн үеэр ирц хүрээгүйг СЕХ ажлаа тааруу  зохион байгуулж байна гэсэн шүүмжлэл байна. Тухайлбал цас ихтэй алслагдсан аймгуудын санал хураалтын ирц хүрсэн байхад нийслэлд 149 хэсэгт дахин санал хураалт явуулах болсныг юу гэж ойлгох вэ?

-Аймаг, дүүрэг, сумын  ИТХ-ын сонгуулийн тухай  хуульд зааснаар ИТХ-ын сонгуулийг тухайн аймгийн сонгуулийн  хороо зохион байгуулна. Дүүргийн ИТХ-ын сонгуулийг дүүргийн сонгуулийн хороо зохион байгуулна. Сумын иргэдийн төлөөлөгчдийн хурлын сонгуулийг сумын сонгуулийн хороо зохион байгуулна. Харин  СЕХ мэргэжил, аргазүйн туслалцаа үзүүлэхээр хуульчилсан.

-Сумдын сонгуулийн дүн гарсан уу?

-Дахин санал хураалттай сумдууд бий. Тэгэхээр нэгдсэн дүн хараахан гараагүй байна. Сумын сонгуулийн дүнг сумын сонгуулийн хороо гаргаж аймагтаа мэдээлэх үүрэгтэй.

-Орон нутгийн сонгуультай холбоотой хэчнээн маргаан гарсан бэ?

-Орон нутгийн сонгуультай холбоотой нам эвслийг хуульд заагаагүй үндэслэлээр бүртгэхгүй байгаа гэсэн маргаан болон нэр дэвшигчийг бүртгээгүй гэсэн хоёр гол маргаан гарсан байгаа.

Үүнийг СЕХ удаа дараа зөвлөмж өгөхөд зарим аймаг, сум хэрэгжүүлж амжаагүй байдал гарсан.

СЕХ хуулийн дагуу автоматжуулалтыг хэрэгжүүлэх үүрэгтэй ажлыг хариуцна. Нэрсийн жагсаалттай холбоотой асуудлыг УБЕГ, саналын хуудастай холбоотой зөрчлийг цагдаагийн байгууллага хариуцна гэх мэтээр эрх үүргийг нь хуульд тодорхой заасан байгаа.

Нийслэлийн дүүргүүдийн хувьд ирц хүрсэн таван дүүрэг байгаа аж. Гэхдээ зарим хороонд ирц хүрээгүйгээс нэгдсэн дүн хараахан гараагүй байгаа юм байна. Нийт дүүргүүдээс дүн нь гарсан Багануур  25 мандатаас МАН-13, АН-12, Багахангай 17 мандатаас МАН-12, АН-5,Налайх 25 мандат МАН-11, АН-12, МАХН-МҮАН “Шударга ёс” эвслээс -2 төлөөлөгч тус тус сонгогдсон байна.

Н.Түвшин