Улсын Дээд шүүхийн хяналтын шатны эрүүгийн хэргийн шүүх хуралдаанаар Н.Энхбаяр, Д.Дуламсүрэн, Д.Чулуунбаатар, Ж.Мягмаржаргал нарт холбогдох хэргийг өчигдөр  хянан хэлэлцлээ.

Нийслэлийн Сүхбаатар дүүргийн шүүх 2012 оны 8 дугаар сарын 2-ны өдөр дээрх хэргийг анхан шатны журмаар хянан хэлэлцээд Н.Энхбаярыг дангаараа болон бусадтай бүлэглэн албан тушаалын байдлыг урвуулан ашиглаж бусдын эд хөрөнгийг завшиж, үрэгдүүлэн онц их хэмжээний хохирол учруулсан, мөн төрийн албан тушаалтан албаны эрх мэдэл буюу албан тушаалын байдлаа урвуулан аж ахуйн нэгж байгууллагад онц их хэмжээний хохирол учруулсан, Д.Чулуунбаатарыг бусадтай бүлэглэн бусдын эд хөрөнгийг завшиж онц их хэмжээний хохирол учруулсан, Ж.Мягмаржаргалыг бусадтай бүлэглэн бусдын эд хөрөнгийг завшиж онц их хэмжээний хохирол учруулсан, мөн давтан үйлдлээр хуулиар хориглосон мөрийтэй тоглоом тоглосон гэмт хэрэг үйлдсэн гэм буруутайд тус тус тооцож, хуульд заасны дагуу биечлэн эдлэх ялыг Н.Энхбаярт 4 жил, Д.Чулуунбаатарт 2 жил 1 сар, Ж.Мягмаржаргалд 3 жил 6 сар хорих ялаар тогтоосон байна.

Харин Д.Дуламсүрэнг бусадтай бүлэглэн албан тушаалын байдлыг урвуулан ашиглаж бусдын эд хөрөнгийг үрэгдүүлж онц их хэмжээний хохирол учруулсан, төрийн албан тушаалтан албаны эрх мэдэл буюу албан тушаалын байдлаа урвуулан аж ахуйн нэгж байгууллагад онц их хэмжээний хохирол учруулсан гэмт хэрэг үйлдсэн гэм буруутайд тооцон хуульд заасны дагуу оногдуулсан үндсэн болон нэмэгдэл ялыг Өршөөл үзүүлэх тухай хуульд заасны дагуу өршөөн хэлтрүүлжээ.

Нийслэлийн давж заалдах шатны шүүх дээрх хэргийг 2012 оны 9 дүгээр сарын 25-ны өдөр давж заалдах шатны журмаар хянан хэлэлцээд анхан шатны шүүхийн шийтгэх тогтоолд "Эрүүгийн хуулийн 49 дүгээр зүйлийн 49.2-т заасныг журамлан ТВ-9 телевизийн хууль бусаар олсон эд хөрөнгийг хурааж улсын орлого болгосугай" гэснийг "Эрүүгийн хуулийн 49 дүгээр зүйлийн 49.2-т заасныг журамлан ТВ-9 телевизийн хууль бусаар олсон 119.534.302 төгрөгийг хурааж улсын орлого болгосугай" гэж өөрчилсөн байна. Мөн шийтгэх тогтоолд "Иргэний хуулийн 9 дүгээр зүйлийн 9.4.7 дахь хэсэгт зааснаар "Өргөө" НӨҮГ-ыг татан буулгаж, "Дун-Өргөө" хамтарсан компани байгуулах тухай Нийслэлийн Иргэдийн төлөөлөгчдийн хурлын тэргүүлэгчдийн 2007 оны 10 дугаар сарын 17-ны өдрийн 188 дугаар тогтоол, Нийслэлийн Засаг дарга Ц.Батбаярын 2007 оны 11 дүгээр сарын 07-ны өдрийн 555 дугаар захирамжийг тус тус хүчингүй болгосугай" гэсэн нэмэлт заалт оруулж, шийтгэх тогтоолын бусад заалтыг хэвээр үлдээжээ.

Улсын Дээд шүүхийн хяналтын шатны эрүүгийн хэргийн шүүх хуралдаанаар дээрх хэргийг хянан хэлэлцээд Н.Энхбаяр нь Монгол Улсын Ерөнхийлөгчийн албан тушаалыг хашиж байхдаа албан тушаалын байдлыг урвуулан ашиглаж, эрх бүхий албан тушаалтан нартай бүлэглэн Өргөө" зочид буудал болон “Улаанбаатар таймс” сонин НӨҮГ-уудыг хууль бусаар хувьчилж, өөрийн үүсгэн байгуулсан "Эскон" ХХК-ийн охин компани болгон завшиж, онц их хэмжээний хохирол учруулсан нь нотлогдсон байна гэж үзэв. Мөн Д.Дуламсүрэн, Д.Чулуунбаатар нарыг эдгээр хэрэгт хамтран оролцогчоор тогтоосон нь хууль зүйн үндэслэлтэй байна гэж дүгнэлээ.

Харин Н.Энхбаяр нь Япон улсын Буддын шашны Агоншү шашны байгууллагаас ирүүлсэн телевизийн тоног төхөөрөмжийг завшсан болон Монгол Улсын Ерөнхийлөгчийн албан тушаалын байдлыг урвуулан ашиглаж, Ж.Мягмаржаргалтай хамтран "Эрдэнэт үйлдвэр" ХХК-д онц их хэмжээний хохирол учруулсан гэх үйлдлүүдийг шалгасан хэдий ч хангалттай нотлогдож тогтоогдоогүй байна гэж үзэж, Эрүүгийн байцаан шийтгэх хуулийн 248 дугаар зүйлийн 248.1.2-т зааснаар хэрэгсэхгүй болгов.

Ийнхүү Дээд шүүхээс Н.Энхбаяр, Ж.Мягмаржаргал нарт холбогдох хэргийн зарим үйлдлийг хэрэгсэхгүй болгосонтой холбогдуулан шийтгэх тогтоолоор оногдуулсан хорих ялын хэмжээг багасгаж, биечлэн эдлэх ялыг Н.Энхбаярт 2 жил 6 сар, Ж.Мягмаржаргалд 1 жил байхаар тогтоож, харин Д.Чулуунбаатарт оногдуулсан 2 жил 1 сарын ял хорих болон Д.Дуламсүрэнг өршөөн хэлтрүүлснийг тус тус хэвээр үлдээлээ.

Түүнчлэн Нийслэлийн давж заалдах шатны шүүхийн магадлалын "Эрүүгийн хуулийн 49 дүгээр зүйлийн 49.2-т заасныг журамлан ТВ-9 телевизийн хууль бусаар олсон 119.534.302 төгрөгийг хурааж улсын орлого болгосугай" гэсэн хэсгийг хэрэгсэхгүй болгож шийдвэрлэв.

Н.Бүжин