Мэдээлиийн сайтуудаар “Н.Энхбаярыг хэн хэн эргэв” гэсэн гарчигтай, монгол хүн бичсэн гэхэд итгэхийн аргагүй нэгэн материал гарсныг уншаад  үнэхээр эмзэглэв. Гарчгаас нь хараад гайхахад хүрлээ.  Хэзээ монгол хүн зовж шаналсан нэгнийгээ эргэж тойрохыг цээрлэдэг болоов. Дэндүү ядмаг, өчүүхэн атгаг санаа харагдав. Н.Энхбаяр гэдэг хүнийг эмнэлэгт илааршуулах биш, хамгийн харгис шоронд тамлаж үхүүлэх учиртай юм байх.Түүний санаачлан байгуулсан /үнэн хэрэгтээ бусдын сүйтгэсэн МАХН-аа аварсан/ нам нь нэг хүн, нэг гэр бүлд л үйлчилж байгаа юм байх. Н.Энхбаярыг эмнэлэгт ч байна уу, шоронд ч байна уу эргэж тойрч, асарч сувилж болохгүй. Намын нөхөд дэмжигчэд нь өмөөрч хамгаалж болохгүй гэсэн атгаг санаа агуулсан байх юм. За бас болоогүй, хэн хэдэн удаа эргэсэн гэдгийг өдөр судар, тоо ширхэгтэй нь тавьжээ. Яасан ч мундаг завтай юм. Ухаандаа түүнийг тэрлэгч нөхөр эсвэл өдөр шөнөгүй хоёрдугаар  эмнэлгийн үүд сахиж, орж гарсныг толгой даран тоолж суудаг ажилтай нөхөр нь хэн нэгэн үүрэгдсэн байх нь. Тэгвэл цалинг  нь хэн өгдөг болж таарах вэ, эсвэл Н.Энхбаярыг харгалзах үүрэгтэй ШШБЕГ-ыхан албан мэдээллийг зориуд задалсан хэрэг болж таарах уу.  Харин ч найз нөхөд, дэмжигчид нь даргыгаа зовсон цагт нь эргэж тойрохгүй бол харин ч хүнлэг бус  явдал биш үү. Монголчуудын язгуур хүн чанараа дээдэлдэг. “Н.Энхбаяр даргыгаа эргэж тойрдоггүй ямар муухай юм бэ” гэхийн оронд “Н.Энхбаярыг байнга эргэж тойроод байх юм, ямар муухай юм бэ” гэж халаглаж байгаатай агаар нэг юм. Уг нь нам, тэр тусмаа Монголын нам бүр монгол хүн, монгол өрх бүрийн төлөө зүтгэх учиртай. Даан ч амьдрал дээр нэг компани, хэсэг бүлэг хүмүүст үйлчлээд байгаа юм биш үү. Д.Сүрэн