УИХ дахь МАХН-МҮАН-ын “Шударга ёс” эвслийн бүлгийн хуралдаан өнөөдөр  болж дуусч, тус бүлгийн ахлагч Н.Батцэрэг сэтгүүлчдэд мэдээлэл хийлээ.

Тус бүлгийн хурлаар Засгийн газраас гаргасан бондын талаархи мэдээллийг хүргэсэн бол гаалийн тухай хуулийг эвслийн бүлэг дэмжсэн байр суурьтай байгаа аж.

 Түүнчлэн Гаалийн  тарифийн хуульд нэмэлт өөрчлөлт оруулах тухай хуулийн төсөлд тус бүлгийн зүгээс тухайлан санал гаргаагүй. Гэхдээ энэхүү хуулийн төслийг манай бүлэг дэмжсэн байр суурьтай байгаа аж. Бүлгийн ахлагч Н.Батцэрэг сэтгүүлчдийн асуултад хариуллаа.

-Шударга ёс эвсэл засгаас гарах уу?

-Тэр талаар бүлэг ярих субьект нь биш юм. Гэхдээ энэ долоо хоногт “Шударга ёс” эвслийн Удирдах зөвлөл  хуралдана. Тэр хурал дээр засгаас гарах асуудлыг хөндөх байх.

-Бондын хувьд?

-Эхний ээлжинд дэлгэрэнгүй мэдээлэл авч байна. Бондын хүү  төлөгдөөд явж байна. Техник эдийн засгийн үндэслэл бүхий ямар төсөл хөтөлбөрийг  манай яам хэрэгжүүлэх үү гэдэгт анхаарал хандуулж байгаа.  Төслийг хэрэгжүүлэх ямар гадаад дотоодын компани байна. Төслийг ямар шат дарааллаар  шалгаруулах вэ гэх мэтчилэн мэдээллийг бүлгийн хурлын үеэр  сонслоо. Бүлгийн хурал дээр сонсгосон мэдээллээр бол Ерөнхий сайдаар ахлуулсан бодлогын зөвлөл ажиллах юм байна.  Төсөл хөтөлбөрийг Эдийн засгийн хөгжлийн яамд төвлөрүүлнэ.  Тэндээс ач холбогдол бүхий төсөл хөтөлбөрийг бодлогын зөвлөл рүү оруулаад дэмжвэл түүнийг Засгийн газрын хуралдаанаар оруулж батлуулна. Дараа нь УИХ-д танилцуулгаар хүргүүлэх  юм. Бүлэг бүх зүйлийг сонсоод орхихгүй. Хоног тутамд хүү тооцоогдож байгаа учраас УИХ Засгийн газрыг бүрдүүлж байгаагын хувьд хариуцлагатай бодит шүүмжлэлийг өрнүүлэх, дэмжих байр сууринаас ажиллах ёстой гэж манай гишүүд үзэж байгаагаа илэрхийлсэн.

-Эвслийн Удирдах зөвлөлийн хурлаар ямар асуудлыг хэлэлцэхээр төлөвлөж байна вэ?

-Асуудлаа төлөвлөсөн гэсэн мэдээлэл алга. Миний төсөөлж байгаагаар МАХН-ын Удирдах товчооны хурлаар хэлэлцэж шийдсэн Засгийн газраас гарах тухай асуудлыг хэлэлцэх байх. Гэхдээ МАХН-ын шийдвэр бол эвслийн шийдвэр биш.

-Бондтой холбогдуулан Эдийн засгийн хөгжлийн яаманд бэлэн болсон төсөл хөтөлбөр хэд байна вэ?

-Өнөөдөр  эл асуултыг сайд нараас асуусан. Нэр зааж хэлсэнгүй. 100 орчим төслөөс 30 гаруй нь техник эдийн засгийн үндэслэл бүхий төсөл байгаа гэсэн мэдээлэл байна. Уул уурхай, барилга, төмөр зам, авто зам, эрчим хүч зэрэг салбарт  хөрөнгө оруулалт хийхээр төлөвлөж байгаа.