МҮОХ-ны ээлжит чуулганыг шинээр байгуулагдсан Соёл, спорт, аялал жуулчлалын яам болон Биеийн тамир, спортын улсын хороо зэрэг байгууллагуудын удирдлагууд хэзээ хуралдахыг нь гурван сарын өмнө зарлаж, нээлттэй үйл ажиллагаа явуулах ёстой гэж шүүмжлээд авсан. Гэвч МҮОХ төрийн бус байгууллагын хувьд төрөөс хараат бусаар үйл ажиллагаагаа явуулж ирсэн түүхтэй. Тус холбоог төрийн мэдэлд байлгах гэсэн хатуу байр суурь олон жилийн өмнөөс улбаатай бөгөөд өдгөөг хүртэл хэл ам дагуулж ирсэн юм. 12 дугаар сарын 19-нд болох МҮОХ-ны ээлжит чуулганаар тус холбооны ерөнхийлөгчийн тайлан болон цаашид авч хэрэгжүүлэх асуудлыг авч хэлэлцэх юм. Тус чуулганы гишүүд ирэх дөрвөн жилд тус байгууллагыг удирдах ерөнхийлөгчөө сонгоно. Энэхүү сунгаанд Улсын Ерөнхий прокурор, Жүдо бөхийн холбооны дэд ерөнхийлөгч Д.Дорлигжав, Голомт банкны ТУЗ-ын дарга асан Г.Баясгалан, одоогийн ерөнхийлөгч Д.Загдсүрэн нар нэр дэвшихээр мэдүүлгээ өгсөн байна. МҮОХ-ны даргын суудалд санаархсан хүмүүс байнга хэл ам хийж, удирдлагаа муучилж ирсэн ч Д.Загдсүрэнгийн хувьд 2008, 2012 оны Зуны олимпийн үеэр тус холбоог тэргүүлж байх үед монголчууд анхныхаа Олимпийн алтан медалийг авч олимпт оролцсон баг, тамирчдынхаа чансааг нэмж бахдам амжилт гаргаж байсан билээ. Нөгөөтэйгүүр, түүний нэр Олон улсын олимпийн хорооны шинээр элсүүлэх гишүүдийн нөөцөд багтаж байгаа бөгөөд олон улсын спортын тавцанд нэр хүнд нь өндөр байгаа тохиолдолд МҮОХ-ны ерөнхийлөгч болсон, болоогүй ОУОХ-ны гишүүнээр сонгогдох боломж нь нээлттэй хэвээр байна. Эх сурвалж www.wikimon.mn