МАХН-ын нарийн бичгийн дарга Г.Шийлэгдамба өнгөрсөн долоо хоногт хэвлэлийнхэнд хандаж ярилцлага өгсөн юм. Тэрбээр энэ үеэрээ Н.Энхбаяр даргынхаа хэргийг удахгүй цагаадна гэдэгт итгэлтэй байгаага илэрхийлж, манай намынхны явуулж байгаа үйл ажиллагаа шүүх, хуулийн байгууллагынханд нөлөөлж байгаа хэмээсэн юм. Тэгвэл аль нэг нам хүчин шүүх засаглалд нөлөөлөхийг оролдох нь хориотой нь мэдээж. Хууль дүрмээ даган дээдлэдэггүй манай нийгэмд л МАХН шиг нэг хүний төлөө үйлчилсэн нам л ийм алхам хийх нь ойлгомжтой. Тэгвэл яг энэ асуултыг нэгэн сурвалжлагч тус намаас УИХ-д орж ажиллаж буй З.Баянсэлэнгэ гишүүнээс асуусан байна. Танай намынхан шүүх засаглалд нөлөөлөхийг оролдоод байна уу даа? хэмээх сурвалжлагчийн асуултад З.Баянсэлэнгэ гишүүн “Бид нар юу гэж нөлөөлөх вэ, нөлөөлөх ч боломжгүй, нөлөөлдөг байсан бол өдийд УИХ-д олуулаа байх байсан юм” гэжээ. Ийнхүү тус намын лидерүүдийн үг яриа олны өмнө зөрөх нь олширчээ. Н.Өрнө