Дархан-Уул аймагт найман настай хүүг барьцаалан эцэг эхээс нь 100 сая төгрөг нэхсэн хэрэг гарсан билээ. Хүүг 30 цагийн турш барьцаалж Засаг даргын Тамгын газарт ажиллдаг аав Б рүү нь ойр ойрхон утасдаж мөнгөө хурдан өгөхийг шаардаж байсан. Гэвч энэхүү гэмт хэрэг гарснаас 30 цагийн дараа гэмт этгээд хүүг нь гэрийнх нь гадаа орхиод зугатсан байна.
Харамсалтай нь хүү гэмт хэрэгтний царайг харж чадаагүй. Нүдийг нь боосон, толгойд нь даавуун уут углаад байсан гэжээ. Хүүгийн мэдүүлж буйгаар гэрийнх нь гадаа буулгасан этгээд эргэж харж болохгүй. Харвал буцаагаад аваад явна шүү. Гэртээ ор гэж хэлээд явжээ. Мөн хүүг зодож биед нь ямар нэг шарх сорви үлдээгээгүй байна. Барьцаалагдсан хүү гэртээ ирсэн ч цагдаагийнхан гэмт этгээдийг эрэн сурвалжлах ажлаа зогсоогоогүй юм.
Дархан-Уул аймгийн цагдаагийн хэлтсийнхэн шуурхай ажиллаж гэмт хэрэгтэнг илрүүлэн өчигдөр орой баривчилсан байна. Утасныхаа дугаарын нууцалсан энэ этгээдийг олж илрүүлэхэд хүндрэлтэй байсан ч цагдаагийнхан шуурхай ажиллаж гэмт хэрэгтнийг барьсан нь дахин ийм төрлийн гэмт хэрэг гарахаас сэрэмжлүүлж чадлаа.
Мөн иргэдийг ч айдаснаас нь салгасан байна. Эх сурвалжуудын мэдээлж буйгаар гэмт хэрэгтнийг мөрдөн байцаах ажиллагаа үргэлжилж байгаа. Тэрээр барьцаалагдсан хүүгийн ар гэрийнхэнтэй хамаатан садны холбоотой байж. Тодруулбал, хохирогчдыг маш сайн мэддэг хүн нь байжээ. Харамсалтай нь зарим эх сурвалжуудын мэдээлж буйгаар үүрэн холбооны оператор компани дугаараа нууцалсан гэмт хэрэгтнийг илрүүлэхэд туслалгүй хувь хүний нууц, бизнесийн нэр хүнд гэсэн байдлаар хандаж байжээ.
Мөн барьцаалагдсан хүүгийн аав Мобиком компанид хандан нууцалсан дугаарыг илрүүлэхэд туслахыг хүссэн ч боломжгүй гэсэн хариу өгчээ. Ийм тохиолдолд үүрэн холбооныхон хууль хяналтынхныг байлцуулан хамтран ажилладаг байхгүй бол цаашид ямар ч хохирол гарахыг таамаглах аргагүй юм.
Эх сурвалж: www.times.mn
СЭТГЭГДЭЛ БИЧИХ