Өнгөрсөн долоо хоногт Энэтхэгийн нийслэл Дели хотод гарсан хүчингийн хэргээс болж энэтхэг залуус эмэгтэйчүүдийн эсрэг гэмт хэрэг, тэдний эрх зөрчигдөж, амь нас нь үнэгүйдэх болсонд бухимдлаа илэрхийлж жагсаал цуглаан өрнүүлж байгаа. Хохирогч эмэгтэйд яаралтай эрчимт эмчилгээ хийх шаардлагатай хэмээн үзэж Сингапурын эмнэлэгт хүргэн эмчилгээгээ эхлүүлсэн боловч харамсалтай нь өчигдөр орой тэрээр өвчин шаналалаа дийлэлгүй амьсгал хураажээ. Эмч нар хэлэхдээ түүний гэр бүлийнхэн амжиж ирсэн, бид бүхий л шаардлагатай арга хэмжээг авсан боловч биеийн байдал нь  хэтэрхий хүнд байсан, мөн эмэгтэйн бие сулхан байснаас эмчилгээ хурдан нөлөөлж чадаагүй гэсэн байна.Тэрээр зөвхөн хүчиндүүлээд зогсохгүй биедээ, тархиндаа хүнд бэртэл авсан байсныг эмч нар хэлсэн. Эмэгтэй өөрийгөө хамгаалахыг оролдож эсэргүүцэл үзүүлэхдээ зодуулсан тухайгаа хэлж байсан ажээ. Энэ тухай Энэтхэгийн ерөнхий сайд “Үнэхээр харамсалтай байна. Залуу хатагтай ийм эмгэнэлтэйгээр  амиа алдсанд гүнээ харамсаж байгаагаа илэрхийлж байна” хэмээн хэлэв. Эмэгтэйг хүчирхийлсэн зургаан залуу баривчлагдсан бөгөөд энэ хэрэгт мөн  хоёр цагдаа сэжиглэгдэн, буруутгагдаж байгаа. Бүсгүйн цогцсыг ойрын хугацаанд Энэтхэгт авчирах юм байна.   Э.Мөнхнасан