Бизина  Иванишвилийн улс төрийн үйл ажиллагааны  бүр анхнаас нь  би түүнийг анхааралтай ажиглаж, түүнийг сонгуульд (2012 оны аравдугаар сарын 1-ний парламентын сонгууль) ялна гэдэгт итгэлтэй байсан юм гэж Гүржийн ерөнхийлөгч асан Эдуард Шевардназе мэдэгдэж байна. Тэр гүржийн “Квела сиахле” сонинд өгсөн ярилцлагадаа ингэж хэлжээ. “Үндэсний хөдөлгөөний” (удирдагч нь ерөнхийлөгч Михаил Саакашвили)  ажил төрөл  дууссан нь мэдээж гэж хуучин ерөнхийлөгч мэдэгдсэн байна. Ерөнхий сайд Бизана Иванишвилийн тухайд гэвэл, тэр зөв замаар явж байна, энэ замдаа тэр ноцтой алдаа гаргахгүй байх нь чухал гэж Швевардназе хэлжээ. “Хүчирхийлэл бол “Үндэсний хөдөлгөөний” онцлог үзэгдэл байсан бөгөөд учир нь чухамхүү уг дэглэм энэ өөдгүй этгээдэд дэмжлэг үзүүлж байлаа. Хэдхэн жилийн хугацаанд 300 мянга орчим хүн шорон гянданд ял эдэлсэн нь  гүржийн ард  түмний эмгэнэлт явдал юм” гэж Шевардназе мэдэгдээд,  Гүржид асар олон тооны хоригдол байгаад сэтгэл түгшиж буйгаа европын дипломатчид, олон улсын байгууллагуудын төлөөлөгчид  түүнтэй уулзахдаа хэлж байсныг онцлон тэмдэглэжээ. Тухайн үедээ чухамхүү миний бие Саакашвилид улс төрийн талаар дээш  гарахад  тусласан бөгөөд ингэсэндээ би гүржийн ард түмнээс хэд хэдэн удаа уучлал эрсэн юм  гэж хуучин ерөнхийлөгч хүлээн зөвшөөрсөн байна. 2003 оны арваннэгдүгээр сард засгийн эрхийг шилжүүлэхдээ Зураб Жванияг тус орны ерөнхийлөгч болно хэмээн үзэж байлаа гэж Шевадрназе мэдэгджээ. “Гэвч  сарнайн хувьсгалаас хойш Михаил Саакашвили  ерөнхийлөгч болох тийм байдлаар хэрэг явдал  өрнөсөн юм. Харин Жваниягийн хэрэг (хуучин ерөнхий сайдын амь насыг бүрэлгэсэн хэрэг) заавал илэрч, ойрын үед олон асуудал тодорхой болно гэдэгт би итгэлтэй байна” гэж Шевардназе онцлон тэмдэглэжээ. С.Золбоо