Монголын соёлын үнэт өв болох “Тириннозаурс батаар”-ыг гадаадад дуудлага худалдаанд оруулах гэж байсныг зогсоож, эх нутагтаа авчрах болсон сайхан мэдээг 2012 оны төгсгөл дээр дуулгасан билээ. Гэхдээ бүр олуулаа болоод ирж байгаа. Харин олуулаа болоод ирж байгаа динозаврын цуглуулгыг дахин хилийн дээс давуулаад алдчихгүй, эх нутагт нь үлдээхийн тулд юу хийх талаар шийдвэр гаргагч нар төдийлөн ярьсангүй. “Тириннозаурс батаар”-ыг эх оронд нь авчирах боллоо  хэмээн баахан хөөрцөглөв. Гэтэл үүний цаана хичнээн динозаврын араг ял гадны музейн үзмэр болж, хөрөнгө чинээлэг этгээдүүдийн цуглуулгыг чимж байгаа бол. УИХ-ын дарга З.Энхболд динозаврын музей байгуулах санал гаргасан нь хөөрцөглөсөн олны дунд содон байлаа. Түүний энэхүү саналыг маш олон хүн дэмжиж буйгаа илэрхийлж саналаа ирүүлсээр байгаа гэнэ. Монголд динозаврын музей байгуулагдсанаар түүх, археологийн маш том баялаг бий болох юм. Цаашилбал гадаадын жуулчдыг татах бас нэг арга болно. Өнөөдөр манай урд хөршийн Эрээн хотод Динозаврын музей байгуулагдаад удаж байна. Эрээн хотыг динозаврын өлгийн нутаг хэмээн сурталчилж гадаад дотоодын олон мянган жуулчдыг татаж байна. Мөн Чингис хааны онгон байгуулсан гээд биднээс түрүүлж сэтгэсэн, хийсэн ажил тэдэнд их бий. Динозаврын музей байгуулах санаа нь хэдийгээр оройтсон ч цаг алдалгүй хэрэгжүүлэхгүй бол Монголын гэх олдвор хомсдож мэднэ. www.times.mn