2012 оны арваннэгдүгээр сарын сүүлчээс Хятадад ирсэн хүйтэн жавар сүүлийн 28 жилийн дээд амжилтыг эвджээ. БНХАУ-ын ус, цаг уурын газрын мэдэгдэлд ингэж өгүүлсэн байна. Хятадын зүүн хойд нутагт 2012 оны арванхоёрдугаар сараас 2013 оны нэгдүгээр сарын эхний хооронд зарим өдөр Цельсийн хасах 15,3 градус хүрч хүйтэрсэн бөгөөд Хятадын хойд нутагт термометрийн мөнгөн  усны багана  тэгээс доош 7,5 градус хүртэл буурчээ. Энэ шинэ он   Бээжин хотын хувьд түүхэн дэх хамгийн хүйтэн жил болж байна.  Нэгдүгээр сарын эхний өдрүүдэд температур  хасах 14-16 градуст хүрч, хүйтэн салхитай хавсран хотынхонд таагүй байдал багагүй үүсгэсэн байна. Үүний хамт Бээжингээс хойш Өвөр Монголд агаарын температур хасах 40 градуст хүрчээ. Хятадын ус, цаг уурын газрын дэргэдэх улсын ус, цаг уурын төвийн мэдээлж байгаагаар,     ирэх долоо хоногт Хятадын хойд нутагт агаарын температурт  дээд  цэгтээ хүрэх гэнэ. Харин ойрын хэдэн өдөр Хятадын өмнөд нутагт үүлэрхэг байж,  бороо, цас орох ажээ. С.Золбоо