Өнөөдөр МАХН-ын хэвлэлийн бага хурал зарлан өвөлжилт хүндэрсэн аймгуудад тусламж үзүүлэх болсон талаар мэдээлэл хийлээ. Мэдээллийг МАХН-ын ХМОНХА-ны дарга З.Бадамсэд, НИТХ-ын төлөөлөгч С.Ононбаяр, Ахмадын холбооны дарга Ё.Шагдарсүрэн, НБД Б.Лхагвацэдэн, НИТХ-ын МАХН-МҮАН-ын Шударга ёс эвслийн бүлгийн ажлын албаны дарга П.Гансүх нар өглөө. Малчдад хандив өгөх, тусламжийн цувааг явуулах ажлын хүрээнд тус намаас зохион байгуулан нийтийн дууны болон рок попын хандивын тоглолтыг хийхээр болсон байна. Түүнчлэн малчин түмэндээ хандив өргөхийг нийт улс төрийн нам хүчин, төрийн болон ТББ-ууд, компани пүүсүүдэд уриаллаа. Түүнчлэн 142013 тусгай дугаарыг ажиллуулахаар болсны зэрэгцээ боогдсон зам давааг нээх ажилд хүч нэмэгдүүлэхээр оюутнуудыг илгээх ажлыг хийхээр болжээ. Мөн өвөлжилтийн байдал хүндэрсэн аймаг сумын малчдад лаа чүдэнз, өвс хивэг, нэмнээ зэргээр хандив өргөхийг хүсвэл МАХН-ын төв байранд өнөөдрөөс эхлэн хүлээн авах гэнэ. П.Наран