Хүний биед мэс хүргэх онцгой эрхтэй цорын ганц мэргэжил бол эмч. Бусад нь хумсны хутга буруу хэрэглэхэд л шоронд явна. Ийм хариуцлагатай алба хаших учиртай монголын  эмч, сувилагч нарын  нэр хүнд  өнөөдөр шавартай хутгалджээ.

Бүр нийгэмд тэдний нэр хүнд шалдаа буусан гэж хэлж болно. Үүнийг баримт түшин өгүүлье.  Өчигдөр гэхэд л Сэтгэцийн эрүүл мэндийн үндэсний төвийн захирал, анагаах ухааны доктор, гавьяат эмч Л.Эрдэнэбаяр эмчийнхээ толгой түрүү рүү цохиж  шалан дээр өшиглөж унаган  дэвсэлсэн хэрэг гарлаа.

Тухайн өдөр Эрүүл мэндийн сайд Н.Удвал тус төвийн ажил байдалтай танилцахаар  очсноор олон жил бугшсан эл асуудал нийтэд ил болжээ. Салбарын сайд нь энэхүү  бусармаг  үйлдэлтэй газар дээр нь нүүр тулсан нь энэ. Гэхдээ нударганы цаана ямар булхай нуугдаж байгааг харж амжаагүй.

Тэгвэл зарим эх сурвалжийн  мэдэгдэж буйгаар Л.Эрдэнэбаяр гавьяат нь Сэтгэцийн эрүүл мэндийн үндэсний төвийг өөрийн хувийн эмнэлэг мэтээр дураан авирлан эмч, сувилагч, асрагч нараа байнга ажлын байрны дарамтад  өртүүлдэг байсан гэх.

Эл эрхэм ашиг сонирхлын зөрчилтэй. Төрсөн хоёр дүү, хүргэн, дүүгийнхээ охидуудыг Сэтгэцийн эрүүл мэндийн төвдөө ажиллуулж улсын эмнэлгийг өөрийн  хувийн компани мэт  уур амьсгалыг бий болгожээ.

Баримт татвал, захирал Л.Эрдэнэбаярын төрсөн дүү Лувсандорж овогтой Эрдэнэчимэг  тус төвийн Нөхөн сэргээх тасагт нярав, түүний хамтран амьдрагч н.Баярсайхан цаг бүртгэгч, тэдний охин Итгэл овогтой Баяржаргал нь мэдээлэл технологийн албанд 2012 оны турш ажиллаагүй мөртлөө цалин авч  ирсэн байх жишээтэй. Түүнчлэн төрсөн дүү Лувсандорж овогтой Эрдэнэцэцэг үнэгүй эм олгогч, төрсөн охин н.Наранчимэг нөхөн сэргээх тасагт реабилитатор гэх мэтээр тус төвд ажилладаг захирлын хамаатнуудын жагсаалт хөвөрнө.

Түүгээр ч барахгүй ажилд орсон хүмүүсээс татаас авдаг. Ингэхдээ  хүн бүрээс мөнгө аваагүй гэж бичүүлж гарын үсгийг нь авч цуглуулдаг байжээ.

Мөн жирэмсний амралттай байгаад буцаж ажилдаа орох гэсэн асрагчаас 2014 онд болох сэтгэцийн албаны 85 жилийн ойн хандив нэрээр 500 мянган төгрөг нэхэж байсан ч удаатай.

Бас нэг ичгэвтэр зүйл нь Л.Эрдэнэбаяр нь  төрсөн дүү нараа болон өөрийгөө байнга шагнаж урамшуулдаг. Ингэхдээ шагнал урамшуулал олгох тушаалаа нийт ажилчдаас нууж ёс зүйгүй үйлдлээ байгууллагын хамт олноос нуун дарагдуулсаар иржээ.

Түүний мөнгөний шунал хэтэрч төсвийн мөнгийг элдэв аргаар идэхийн хэнээ хэтэрсэн, байгууллагын гадаад томилолтын зардлыг өөртөө хуурамч томилолт баримт бүрдүүлж ашиглаж ирсэн гээд түүнтэй холбоотой баримтуудыг дурдаад байвал дуусахгүй.

Ардаар овоглосон гавьяатай салбартаа 25 жил зүтгэсэн эл эрхмийн ёс зүйгүй үйлдлээс эрүүл мэндийн салбарын эмч ажилтнуудын зан харилцааны нэгээхэн хэсгийн дүр зураг  харагдаж байна. Дээрх баримт бол ганцхан эмнэлгийн өнөөдрийн бодит байдал. Түүнээс гадна хотын томоохон эмнэлгийн асрагчаас эхлээд сувилагч эмч, дарга даамалуудын зарим нь  гар, сэтгэлээ мөнгөөр хэмждэг болоод удаж байгааг олон нийт мэднэ.

Хүний алтан амь аврах тангараг өргөсөн  цагаан нөмрөгтнүүдийн  бүдүүлэг, ёс зүйгүй харилцаа олон арван өвчтөнүүдийг гомдлын нулимстой хорвоогоос буцаасан гэхэд хилсдэхгүй биз. Энэ мэт баримтууд эрүүл мэндийн салбарын идээ буглааг  илаашруулах цаг  ирснийг  шинэчлэлийн Засагт сануулсаар байна.

Н.Түвшин