- Энэ сарын 23-наас эхлээд нийтийн тээврийн үнэ 600 төгрөг болно гэнэ -

Гадуур өргөн хэрэглээний барааны үнэ гаарч, зарим хүнийг “шок”-онд оруулж байна. Өргөн хэрэглээний барааны үнэ өртөг яагаад ингэж гэнэт огцом өсөх болсон шалтгаан нь олоход амархан ч арай дэндүү шалтгаанаар ард түмнийг шантаажилж байна. Сар хүрэхгүй хугацааны дараа Цагаан сар гэж сүр дуулиантай баяр өрхийн төсвийг өм цөм хамах цаг хаяанд ирж, хүн болгон хямарч байгаа харагдана. Үүнийг дагаад мах, гурил будаа, ахуйн хэрэглээ, шатахууны үнэ гээд огцом нэмэгдсэн. Яалаа даа, нөгөө ШӨХТГ- аас бүх л юмны үнийг боломжийн хэмжээнд барина хэмээн томроод, тодроод байсан О.Магнай дарга нь яасан юм бэ? “Магнай трэйд”, “Шунхлай” зэрэг ШТС-ууд үнээ 50 төгрөгөөр нэмчихсэнийг хүн бүхэн мэдэж, бухимдаж байгаа. Махны үнэ хаданд гарч, мах магнаг болж, адууны мах нэг кг нь 6000-7500 болсон бол нөгөө үхрийн болон хонины махны үнэ талийсан шүү дээ. Худалдагчаас яагаад адууны махны үнэ огцом нэмэгдсэнийг сонирхож асуувал амандаа орсон үнээ хэлж, “Гадуур ханиад ихтэй байгаа учир адууны мах ховордож байна. Аарц, чацарганы үнэ ч нэмэгдсэн байгаа. Яваад асуугаад үзэхгүй юу? Авбал ав, байвал бай. Махаа гуйж зардаг үе өнгөрсөн. Өөрсдөө булаацалдаад авдаг болсон шүү дээ” хэмээн тоомжиргүй хариулах нь тэр. Увсын ориг гэдгийг нь чухам мэдэхгүй ч улаан чацаргана нэг кг нь зургаан мянган төгрөг гээд хөдлөхгүй юм. Гэтэл өргөн хэрэглээний бараа, бүтээгдэхүүний үнэ өсч байгаа сургаар энэ сарын  23-наас нийтийн тээврийн үнэ 600 төгрөг болохоор болсон гэнэ үү? Энэ чинь одоо юу гэсэн үг вэ? 1000 төгрөгөөр хоёр удаа автобусанд суух эрх үгүй боллоо. Яаж ажилдаа ирж, очих юм бэ? Нийтийн тээврийн газрын дарга Г.Наранцэцэг эрүүл мэндийн шалтгааны улмаас ажлаа хүлээлгэн өгч Ч.Энхбат гэж нэг нөхрийг томилсон. Тэр хүний толгойд юу бодогдож байгааг хэн ч таашгүй. Одоо автобусны үнэ нэмэгдэх сургаар микроавтобус болон халтуурны таксичид дур зоргоороо амандаа орсон үнээ хэлж, ард иргэдийг айлгаж сүрдүүлнэ биз ээ. Цахилгаан тээврийн хэрэгсэл нь 200 төгрөг байсан, тэгэхээр 400 төгрөгөөр үйлчилнэ гэсэн үг үү? Хөхөө өвлийн хүйтэнд хүмүүс алхахгүй нь тодорхой тул нийтийн тээврээр зорчих хүмүүс цан хүүргээ татуулсаар суух нь ойлгомжтой. Гэхдээ нэг дутагдалтай тал ажиглагддаг нь орой 21 цаг жаахан өнгөрөөгөөд холын чиглэлийн автобуснууд зогсчихдог гэмтэй. Тэгээд л хоёр, гурав дамжиж шөнийн 23 цагт гэртээ орж байвал жаргал нь тэр юм даа. Уг нь Улаанбаатар хотын зорчигч урсгал, нийтийн тээврийн хэрэгцээ улам бүр өсөн нэмэгдэж байгаа нь үнэн. Гэтэл нэг талаас төрөөс барьсан хатуу үнэ тариф, нөгөө талаас цахилгаан дулаан түлш, шатахуун сэлбэг хэрэгслийн өсөлтийн дунд үйлчилгээний чанар буурах, хөдөлмөрийн аюулгүй байдал алдагдах, ажилчдын нийгмийн хамгааллын асуудал орхигдож байна гээд ярьдаг. Нийтийн тээврийнхэн чанарын шаардлагаа хангаагүй байж үнээ нэмэхээ л хамгийн түрүүнд боддог. Ядаж л орой 23 цаг хүртэл холын автобусаа явуулдаг баймаар байна шүү дээ. Нийтийн тээврийн газраас үнэ нэмэх шаардлагатай гэж үзэж байгаа гэнэ. Ямар бодлого барьж, тооцоолж гаргасан мөнгө юм бол, бүү мэд. Цагаан сар дөхлөө. Монголчууд бид хүний гарын алга гялайлгах дуртай улс. Бэлэг  сэлт нэрээр Эрээний барааг их хэмжээгээр оруулж ирдэг жишиг тогтоод удаж буй. Тэгээд л өрөөсөн оймс, уранхай алчуураар сэтгэлийг нь хуурна, өөр яадаг юм бэ. Үндэсний үйлдвэрлэлээ дэмжиж Монголдоо үйлдвэрлэсэн бараа, бүтээгдэхүүнийг бэлэг болгон өгье хэмээн Ерөнхий сайд Н.Алтанхуяг зад рекламдаад байсан. Гэтэл дотооддоо үйлдвэрлэсэн юмных нь үнэтэйг яана аа. Авах хүн байдаг л байх даа. Уг нь Цагаан сарыг бэл бэнчингээр гайхуулан, идэж уухын баяр биш, ах дүүстэйгээ уулзалддаг ургийн баяр болгон зарлах хэрэгтэй гэсэн УИХ-ын эмэгтэй гишүүдийн санаачлагыг дэмжиж хэрэгжүүлвэл зүгээр юм шиг санагдаад байгаа юм. Бас нэг дутагдалтай зүйлийг онцолбол баяр ёслолын үеэр ахмадуудад болон хөгжлийн бэрхшээлтэй иргэд, хүүхдийн халамжийн мөнгийг өгдөг жишиг тогтсон. Энэ нь урд хөршийн банкинд хөрөнгө оруулалт болоод дуусчихдаг. Ууцны үнэ хэмжээнээсээ хамаараад 120-350 төгрөгийн үнэтэй байна билээ. Цагаан сар дөхөхөөр бүр хэтэрнэ дээ. Яана даа, яана. Тавгийн идээ болох ул боов ч “Өгөөж”, “Талх чихэр”, “Суман гүн” зэрэг үйлдвэрийн үнэ янз бүрийн л үнэтэй зарагдах нь нэг ширхэг нь 800-1200 төгрөгийн үнэтэй байна.  Нөөцийн махыг хангалттай бэлтгэсэн байгаа гээд мэдээлээд байгаа ч үнэн хэрэг дээрээ үгүй шүү дээ. Мал нь 40 сая хол гартал өсөөд байхад махны үнэ нь гэж ямар ч хэмжээ хязгааргүй нэмэгдээд байдаг улс, орон манайхаас өөр байдаг болов уу даа. Ард түмний авдаг цалин нь хэд билээ. Цалин нэмэгдэхгүй байхад өргөн хэрэглээний барааны үнэ өртөг тэнгэрт тулж, баганадаад байдгийн учрыг бид хаанаас, хэнээс олох юм бэ? Ард түмнийг хаврын тарчиг урт өдрүүдэд элгээр нь мөлхүүлж, халаасны хэдэн төгрөгийг нь нимгэлж, хамраар нь газар хатгуулахаар шийдсэн үү, эрх баригчид болон үйлдвэрлэгчид ээ? Дээрээс нь үнийн зохицуулалтаа зөв хийж, юмны үнийг байх хэмжээнд нь барина байх гэдэгт итгэж байна. Тэр дундаа ШӨХТГ-ын дарга О.Магнай дарга ажлаа сайн хийж байгаа ч улам илүү сайн хийвэл танд талархах хүн олон болно.

Эх сурвалж www.wikimon.mn