Боловсрол, шинжлэх ухааны сайд Л.Гантөмөр төрийн өмчит их, дээд сургуулийн захирлын ажлын байрны тодорхойлолтыг шинэчлэн баталлаа. Дээд боловсролд тоо биш чанарыг эрхэмлэн шинэчлэх, олон улсын түвшинд хүргэх, ил тод, нээлттэй болгох бодлогоо хэрэгжүүлэх зорилгоор энэхүү тушаалыг гаргажээ. Төрийн өмчийн их сургуулиудын ажлын байрны тодорхойлолтоор захирлын хүлээх үүрэг хариуцлагыг илүү тодотгож, өндөр шаардлага тавих болсон байна.

Их сургуулийн захирал нь дараах таван гол зорилт буюу "гэрийн даалгавар" хүлээн авч байна. Эхнийх нь сургалтын чанарыг олон улсын түвшинд хүргэх зорилт. Их сургуулийнхаа үндсэн үйл ажиллагааны үр дүнг захирал бүрэн хариуцна. Их сургуулийн захирал бол ерөнхий менежер. Зөвхөн сургалтын төлбөр, төсөвт баригдах бус хөрөнгийн олон эх үүсвэр олох, санхүүгийн ил тод технологи нэвтрүүлэх менежмент хийх зорилтод хүрнэ.

Сургалтын бүх шатанд ил тод байдлыг хэвшүүлж, бүдэг бүрхэг, бүрэн ойлгомжгүй олон зүйлсийг нээх, элсэгч, оюутан, төгсөгч хэн бүхэнд тавигдах шаардлагад аливаа ялгаварлалыг бүрэн арилгах, хүний эрх чөлөөний үнэт зүйлсийг даган мөрдөж ажиллах даалгавар авч байна. Хүний нөөцөө чанартай болгох, бэлтгэх, суралцагчдыг хөгжүүлэх, нийгмийн асуудлыг нь шийдвэрлэхэд бодитой үр дүн гаргах үүрэг хүлээсэн албан тушаалтан бол их сургуулийн захирал болж байга юм.

Үндсэн зорилго, зорилтуудаа биелүүлэхийн тулд их сургуулийн захиралууд дараах үүрэг хүлээнэ. Жишээ нь Олон улсын түвшинд хүрэхийн тулд сургуулиа хөгжүүлэх стратеги, төлөвлөгөө батлан хэрэгжүүлнэ. Сургалтын хөтөлбөрүүд нь олон улсын хэмжээнд хүлээн зөвшөөрөгдсөн, магадлан итгэмжлэлийн шаардлагыг хангах, оюутан, суралцагч профессор багшаа сонгох, нэгдсэн кредит системд шилжих, мэргэшсэн судалгааны нэгж, багууд бүрдүүлэх, захиалгат ажил, төсөлд оролцох, оюуны өмчийг хамгаалах, судалгаа хийх, хөдөлмөр эрхлэхийг дэмжих, заавал судлах ном, хэвлэлийн жагсаалт гаргах гэх зэрэг үйл ажиллагаа явуулна. Ил тод байдлыг хэвшүүлэх зорилтоо хэрэгжүүлэхийн тулд шударга, нээлттэй, ялгаваргүй, тэгш байх зарчмуудыг тогтооно. Эрдэм мэдлэгийн чөлөөт эрэл хайгуул, шүүмжит сэтгэлгээ, бүтээлч хандлагыг урамшуулах гэх зэрэг үйл ажиллагаа зохион байгуулна. Боловсрол, шинжлэх ухааны яамнаас Монгол Улсын их  сургууль, Хөдөө аж ахуйн их сургууль, Шинжлэх ухаан, технологийн их сургууль, Эрүүл мэндийн шинжлэх ухааны их сургуулийн захирлын ажлын байрны албан тушаалд өрсөлдөх ажилтны сонгон шалгаруулалтыг зарлаад байгаа юм.